Maltempo cu lamper a pone varios area perde coriente

Diadomingo mainta

ORANJESTAD (AAN): E maltempo cu a start desde Diadomingo mainta, ya desde marduga caba tabata azotando tanto Bonaire y Corsou.

   Ya prome cu solo a sali, awacero fuerte tabata azotando San Nicolas y Savaneta.  Poco poco mas area pabao di brug tambe a haya yobida pisa, acompaña pa lamper y strena.  Debi na lamper cu a dal riba liñanan di voltahe halto, varios cas y negoshi a confronta interupcion den e distribucion di coriente den algun bario.

   Poco prome cu 6:50 am, lamper a dal un sector di Savaneta, tambe un bario na Cura Cabay y Zeewijk a wordo afecta.  Mesora tecniconan di NV Elmar a bay aya pa atende cu e situacion.  For di prome bista a nota cu e daño ocasiona na componentenna di coriente na Zeewijk ta extenso, y esaki lo bay dura pa wordo drecha.  Pues no ta djis asunto di yega cambia fuse grandi y pone coriente bek.

   Mientras tanto awacero a sigui basha, y pa 8:00 am, personal di Elmar a yega na e lugar unda lamper a dal na Yara na Savaneta. Sinembargo, debi na e mal tempo, nan a stand-by pa laga e mal tempo pasa, pa asina nan por ehecuta e trabounan di reparacion di un manera safe, tanto pa nan mes como pa esnan den e area. Seguridad ta nan prioridad.

   Poco prome cu 8:40 am, lamper a dal den cercania di Rooi Afo, y esey a pone cu algun cas na Rooi Afo, Paradera, y tambe Dakota a cay afo.  Lampernan tabata dal riba wayanan di voltahe halto.

   Pa 10:10 am, un team di trahador di Elmar a yega cu material na e lugar na Zeewijk na San Nicolas, tambe na Yara na Savaneta y pa e area di Rooi Afo-Paradera, pero debi na e mal tempo, nan a keda stand-by pa laga e mal tempo pasa.   E momento ey awacero a mengua un poco na Savaneta, y asina nan a start cu trabou di reparacion na Yara na Savaneta. Pa por finalisa e trabounan di reparacion, lo ta necesario pa desconecta temporalmente e liña di voltahe halto cu ta suministra coriente na henter e area.  Esaki lo causa un interupcion temporal den e distribucion di coriente na Pos Chiquito, Savaneta y barionan den vecindario.

   Pa 10:40 am, nan a logra reestablece e suministro di coriente den un parti di Paradera.  Sinembargo, Rooi Afo y Sero Patrishi ta ainda sin coriente, ya cu e liñanan di voltahe halto di e areanan aki ta desconecta temporalmente pa e tecniconan por reemplasa e fusenan afecta door di lamper.

   Pa 11:05 am mas o menos, personal tecnico di Elmar a keda cla cu e trabounan di reparacion na Yara, Savaneta, y a logra reestablece e area na e liña di voltahe halto.  Cu esaki, a reconecta e suministro di coriente na Pos Chiquito, Sabana Basora, Savaneta y barionan den vecindario.

   Pa 11:10 am, tecniconan a finalisa e trabounan di reparacion na Rooi Afo, pa remedia e daño causa door di lamper cu a dal riba e liña di voltahe halto. Cu esaki, nan a reestablece e suministro di coriente na Rooi Afo.

   Pa 11:20 am, Elmar a haye obliga na desconecta temporalmente e liña di voltahe halto di Zeewijk, cu ta suministra coriente na Zeewijk y barionan den vecindario, pa asina e tecniconan por ehecuta e trabounan di reparacion necesario riba e liña.

   E desconeccion temporal aki ta necesario pa por ehecuta e trabounan di reparacion y pa seguridad tanto pa nos tecniconan como pa esnan den e area. Como resultado, Zeewijk y barionan den vecindario ta confrontando un interupcion temporal den e distribucion di coriente.

   Sinembargo como 25 minuut despues, durante e trabounan di inspeccion na Zeewijk, e tecniconan a identifica un transformador cu a sufri daño debi na lamper.  Debi na e magnitud di e daño, lo ta necesario pa reemplasa e transformador completo pa por reestablece e suministro di coriente den e area.  Aki nan a calcula cu e trabaonan aki lo bay tuma entre 4 te 5 ora.

   Mientras tanto, Elmar tabatin varios team di tecnico banda di 12:15 pm activo den diferente parti di e isla, atendiendo cu dañonan causa door di e mal tempo.

   Na e momento aki, ainda tin interupcionnan local den e distribucion di coriente cu ta afecta algun bario y parcela individual, debi na dañonan na e red di voltahe abou (laagspanning).  Tecniconan ta sigui traha pa atende cu e situacionnan aki y reestablece e suministro di coriente uno-pa-uno na e clientenan afecta.

   En cuanto interupcionnan na liñanan di voltahe halto (hoogspanning), nos a logra reestablece e suministro di coriente den tur e areanan afecta, cu excepcion di Zeewijk y Seroe Patrishi, unda e trabounan di reparacion ta continua.

    Pa 12:37 pm, Elmar a pone coriente bek na Sero Patrishi. Cu esaki, e suministro di coriente a wordo reestableci den mayoria di areanan afecta pa interupcionnan na liñanan di voltahe halto.

   Na Zeewijk, unda e daño causa door di lamper ta mas severo, e tecniconan ta sigui cu e trabounan di reparacion, cu ta inclui kita e transformer kima, y pone uno nobo, tin di haci keuring di instalacion, y finalmente por a duna coriente bek.  E potret aki ta di archivo di personal di Elmar trahando den mal tempo.