Diahuebs atardi storing a pone 2 transformer conecta cu planta di RECIP IV cay afo

Blackout na Aruba

ORANJESTAD (AAN): Diahuebs den oranan di atardi, ora cu tur hende a kere cu nan trabao, nan studiamento pa CP y S.E. den Biblioteca, of esnan cu ta hunga mashin den Casino lo ta completamente normal, pa 2:00 pm coriente a bay full rond di e isla.  El a socede na un forma unda cu tabatin fluctuacion di coriente, y dado momento el a hasta manera casi bin bek, pa na final pusha un Blackout completo.

    A resulta cu e causa di tur esaki ta ubica den e planta di energia y awa di WEB Aruba NV na Balashi.  Pa sumarisa, e compania a splica cu a surgi un fayo den plantanan. Mesora e teamnan di produccion a cuminza cu e procedura den casonan asina, pa investiga e causa di e Blackout, y cu tur probabilidad e causa ta den plantanan di WEB.

   WEB a bisa cu un storing den sistema electrico ta e causa, y a pone cu a perde conexion cu 2 transformer di e motornan di planta RECIP IV.  E motornan tabata funcionando y debi na storing a perde montante substancial di coriente, y esey a ocasiona cu coriente a cay. E blackout a socede durante testnan regular riba e sistema di voltahe halto cu ta proteha e sistema electrico den planta.

   Entretanto a cuminza mesora cu e proceso di ‘Start Up’, cu segun WEB ta uno pa recupera produccion di energia y suministra esaki segun fase bek pa kabelnan di NV Elmar.  Esaki ta segun e capacidad di MegaWatt (MW) ta aumenta, por cuminza manda coriente pa pueblo.

   Ya prome cu 3:00 pm, e prome barionan ya a cuminsa haya coriente bek.  Asina pa 3:04 pm te cu 3:30 pm a logra reestablece suministro di coriente den e area Kooyman, parti di Paradera, Sabana Berde, Pricesmart, Plaza Padu, Cumana, Avenida Milio Croes, Sabana Blanco, un parti di Savaneta, Pos Chiquito, Santa Cruz, Balashi, Parkietenbos, area di Hospital, Punta Brabo, low-rise hotels y Riu Hotel na Palm Beach.

   Banda di 3:35 pm, segun punto di bista di WEB, e proceso di recuperacion tabata bayendo hopi bon, entretanto nan ta produciendo 76MW di e promedio di demanda regular.

   Pa 3:41 pm, e compania via di Elmar a reestablece e suministro di coriente den e area di Shaba, CMB Bank na Oranjestad, Amsterdam Manor, Divi Phoenix, Camara di Comercio, Bushiri Noord y mas.

   Pa 3:50 pm, a logra pone coriente bek den area rond di ImSan na San Nicolas, Sero Colorado, Pietheinstraat, Brazil, y mas.  Produccion e momento ey ya caba a subi na 91 MW, y ta sigui avanza.

   En total, despues di 2 ora y 23 minuut nan a logra soluciona e Blackout, y tur hende tabatin coriente bek.