Asociacion ATIA ta lamenta e proceso di dialogo tocante salario minimo

Tambe ta lamenta declaracionnan publico di Prome Minister

ORANJESTAD (AAN): Un representante di ATIA, hunto cu representantenan di dos otro organizacionnan empresarial, a ricibi un invitacion pa participa den un dialogo social riba 15 di maart ultimo. Despues di e prome reunion, a keda acorda cu e sector empresarial, sindicatonan laboral y Gobierno di Aruba lo presenta cada un nan topiconan pa e agenda y lo establece protocolnan cla pa regula e proceso di dialogo. Esaki tabata un consideracion esencial pa facilita un discusion constructivo y traha hunto na posibel solucionnan.

   Sinembargo, despues di e di dos reunion, a bira evidente cu ningun di e topiconan presenta pa e organizacionnan empresarial tabata wordo trata. Ademas, e Prome Minister no a acepta e protocolnan presenta door di e organizacionnan empresarial ni tampoco e sindicatonan laboral.

   E establecimento di protocolnan cla ta particularmente importante, como cu anteriormente procesonan di consulta a demostra un tendencia di gobierno cu ta adopta selectivamente cierto resultadonan, mientras ta laga otronan afo. Durante e di dos reunion, e Prome Minister a indica cu e no lo acepta e protocolnan presenta y a declara cu e legislacion por wordo implementa sin e participacion ni aporte di e sector empresarial.

   Como resultado, ningun dialogo sustancial a tuma lugar cu e participantenan, ni tampoco a comparti estudionan, analisisnan of informacion di sosten cu ta forma e base pa e maneho di e propuesto. Pa e motibonan subraya, ATIA ta lamenta e declaracionnan publico di e Prome Minister cu ta sugeri cu e asunto ya a wordo studia y debati ampliamente.

   ATIA semper a keda disponibel pa dialogonan constructivo. Sinembargo, un consulta significativo ta rekeri un participacion genuino di tur stakeholder, y no un proceso den cual e resultado practicamente ya a keda determina prome cu e discusionnan a cuminsa.

   ATIA ta apoya medidanan cu ta fortalece e poder di compra y mehora e bienestar di trahadornan. Na mes momento, decisionnan di e forma aki mester ta basa riba informacion transparente, completo y analisis profundo. Lamentablemente, durante tur e reunionnan aki, no a presenta ni un estudio, informe of informacion di sosten na e participantenan.