AZV kier siguranza cu e fondonan publico ta wordo uza debidamente

Reaccion di AZV riba declaracion di Hospital...

ORANJESTAD (AAN): Manera ta conoci, siman pasa Diabierna den oranan di atardi, Hospital HOH di Aruba a emiti nan opinion caminda nan ta splica cu lamentabelmente cuido medico ta sufriendo danki na decisionnan di AZV y tambe di Ministro di Salubridad Publico.

   Riba Diamars atardi, Organo Ehecutivo (OE) di AZV a duna nan reaccion relaciona cu e situacion di Horacio Oduber Hospital (HOH).

   Segun Organo Ehecutivo (OE AZV), nan ta informa cu Ministerio di Salud Publico, Hospital HOH y OE AZV ta na mesa pa algun luna caba pa atende e situacion cu a surgi.

   Como parti di e atencion aki, OE AZV desde februari di e aña aki a pone recursonan adicional disponibel den forma di voorschotten, pa asina HOH tin mas espacio di liquidez pa por atende e retonan actual. E voorschotten aki -of miho bisa e fondonan di pueblo di Aruba aki- no ta sin condicion. Mirando e tarea importante di OE AZV pa salvaguardia y monitoria tur momento con e placa di e asegurado ta keda uza, OE AZV ta stipula condicionnan cu mester cumpli cu ne.

   Segun AZV, e condicionnan aki ta pa sigura cu e fondonan publico ta wordo uza debidamente y cu continuidad, accesibilidad y calidad di cuido den hospital ta garantisa.

   Actualmente partidonan ta pendiente di resultadonan di e estudionan cu hunto nos ta haciendo. E estudionan aki ta necesario pa por yega na un solucion structural y duradero pa e situacion actual pero tambe pa futuro. Un biaha mas, awe en espera di e resultadonan, OE AZV a otorga Hospital HOH e suma di 15 miyon Florin adicional di ‘voorschot’. Cu esaki e suma di voorschotten adicional pa Hospital HOH na 2026 a yega Afl. 31 miyon.

   Cu e pasonan aki, tanto Ministerio di Salud Publico como OE AZV ta mustrando un compromiso pa garantisa accesibilidad y continuidad di cuido specialisa den hospital.

   “Nos tin confiansa cu, mediante dialogo constructivo, colaboracion y transparencia entre partidonan, lo yega na un solucion duradero pa e situacion, na interes general di nos aseguradonan,” e boletin di OE AZV a finaliza ta indicando.