131 Aruba a comparti conocemento cu Sentro Akseso Bonairu

ORANJESTAD (AAN): 131 Aruba a ser Funda na 1999 y desde e tempo ey ta scucha nos muchanan y hobenan,

ta duna nan sosten emocional, conseho y guia tur dia di 2:00 te cu 6:00 di atardi via telefon, email y chat. No solamente e mucha y hoben di Aruba ta tuma contacto cu 131 Aruba, pero e mucha y hoben di Bonairu, St. Euststius y Saba tambe tin acseso na e servicio di 131 Aruba via e number di telefon 918 tur dia di 2:00 te cu 6:00 di atardi.  

Banda di e servicio via telefon, email y chat, 131 Aruba ta duna lectura, workshop y proyecto tocante 26 tema na tur scolnan aki na Aruba. 

Despues di mas di 20 aña di existencia, experticio y experiencia, na aña 2022 131 Aruba a incorpora un ‘Kenniscentrum’ den e organisacion. Pa medio di e ‘Kenniscentrum’, 131 Aruba ta exportanando conocemento na organisacionan gubernamental y no-gubernamental den region. Un di e organisacionan den region cu a acerca 131 Aruba pa sosten ta Sentro Akseso Boneiru. 

Sentro Akseso Boneiru ta e organisacion di cuido social y asistencia social na Boneiru. Na Sentro Akseso Bonairu, e servicionan di diferente organisacionan exsistente a ser combina pa asina e pueblo di Boneiru por haña yudansa mihor y mas lier. Sentro Akseso Bonairu ta ofrece sosten y orientacion, manera sosten pa mayornan, guia di presupuesto, conseho riba perdida y relacion, y yudansa cu problemanan psychosocial. Pa por keda duna servicio di calidad, Sentro Akseso Bonairu ta organisa diferente training pa su personal. 

Den e siman di 19 pa 22 di october ultimo, Sentro Akseso Bonairu a organisa Siman di Konosementu, Resilience – Huntu nos ta Konstrui. 131 Aruba a ser acerca pa Sentro Akseso Bonairu pa compati conocemento cu e personal di Sentro Akseso Bonairu. Ariba diaranson 21 di October  131 Aruba a comparti conocemento y experticio pa medio di workshops tocante termento na e personal di Sentro Akseso Bonairu. Tambe e tema hoben a ser trata pa medio di workshop cu e personal di Sentro Akseso Bonairu ariba diahuebs 22 di October. 

E personal di Sentro Akseso Boneiru a keda contento cu e conocemento comparti. E experiencianan practico y stimulacion pa papia di temanan social na un manera habri y interactivo. Cu e workshops no solamente a comparti conocemento, experiencia y ideanan nobo, pero tambe a contribui na concientisacion, desaroyo personal y coneccion entre coleganan.