Otmar Oduber di PPA ta puntra gobierno unda Bodycams y Dashcams pa polis a keda

Corda cu 21 miembro di Parlamento incluso Arthur Dowers, e tempo ey a firma e mocion

ORANJESTAD (AAN)-- Lider di Partido Patriotico Arubiano (PPA), señor Otmar Oduber, den entrevista cu DIARIO a lanza e preguntanan aki pa Gobierno AVP-Futuro: “Unda e bodycams ta pa nos polisnan? Unda e dashcams cu 21 miembro di Parlamento, incluyendo Arthur Dowers e tempo ey den oposicion, a firma? Kico nos ta wardando, un polis wordo tira mata? Nos ta wardando atrobe un situacion caminda cu nos polisnan cu ta pone nan bida na peliger den trabao, pa nos lamenta? Mescos cu a sosode e tempo di e hoben cu a wordo tira cu 21 bala? Unda e mocion ey a keda?” Asina Otmar Oduber a expresa, den su cuestionamento.

   El a señala cu su persona den Parlamento a cuminza cu un amienda, cual su colega Ed a ripiti’e.

   “Nos a pone placa disponibel. Nos a bisa cu ta 21 miembro di Parlamento a bisa cu bodycam mester bin pa proteha e polis, pero pa proteha e comunidad, tambe. Ora algo pasa bo sa cu bo tin’e riba un camara. Bo tin prueba di loke a sosode pa cuida e ciudadano y pa cuida e polis. Nos ta warda te e proximo desgracia sosode anto nos tur ta lamenta atrobe, nos tur ta bay Parlamento, nos tur ta bay bisa e ora ‘awo si nos ta pasa e mocion’ pa nos por trece e tipo di cambionan aki. Esey ta e nivel abao di un Parlamento cu no ta funciona!” Lider di PPA a enfatiza.