Scouting Aruba a fortalece resiliencia di hobennan durante JOTA-JOTI 2026

ORANJESTAD (AAN): Den fin di siman, Scouting Aruba a organiza su actividad nacional JOTA-JOTI na Briyo Di Solo,

bou di e tema “Mind Builders – Strong Minds, Connected World”. Durante 24 ora, Verkenners y Explorers a participa den un programa educativo cu enfasis riba perseverancia, pensamento critico, comunicacion y colaboracion.

   JOTA-JOTI (Jamboree On The Air – Jamboree On The Internet) ta conecta Scoutnan mundialmente via radio y internet. Pa e edicion aki, Scouting Aruba a combina e conexion internacional cu aventura y siñamento, ofreciendo hobennan oportunidad pa fortalece nan confianza y habilidadnan social.

   E concepto Mind Builders ta promove un mentalidad positivo frente di desafio: no ta necesario logra tur cos na e prome intento. Door di sigui purba, adapta estrategia y siña di erornan, hobennan por crece y desaroya mas confianza den nan mes.

   Diabierna anochi, despues di e apertura y formacion di patrolnan, e participantenan a completa seis Night Missions. JOTA Radio Rescue a enfoca riba comunicacion via radio, mientras JOTI Global Spy Mission a stimula conexion internacional y colaboracion digital.

   Pressure Pack a desafia nan pa maneha presion y adapta estrategia. The Web a destaca colaboracion y inclusion; Mind Maze a pone memoria y paciencia na prueba; y Lost in My Mind a combina orientacion, confianza y toma di decision.

   Cada mision tabata conecta na obhetivonan educativo, demostrando cu obstaculonan por bira oportunidadnan pa siña y encontra solucionnan hunto. E anochi a conclui cu un campfire y reflexion, fortaleciendo amistad y compañerismo.

   Diasabra, seis actividadnan adicional a aborda resiliencia, creatividad, resolucion di problema, reconocemento di emocionnan y e importancia di busca y ofrece ayudo.

   Un componente central tabata e Mind Builders Quest, un desafio colectivo di 90 minuut. Cada patrol mester a completa seis checkpoint pa colecta piezanan necesario pa e mision final. Ningun patrol por a logra e meta su so: solamente compartiendo informacion y uniendo nan contribucionnan, nan por a completa e desafio.

   E experiencia a reforza cooperacion, liderato comparti y comprension mutuo. E programa a inclui tambe servicio comunitario, motivando hobennan pa transforma loke nan a siña den accionnan positivo pa otronan.

   Cu e actividad aki, Scouting Aruba ta reafirma su compromiso cu e desaroyo integral di hobennan. Su metodologia di siña door di haci, experimenta y reflexiona ta contribui na forma personanan resiliente, responsabel y empatico, prepara pa aporta na sociedad.

   Scouting Aruba ta gradici ATHA, Briyo Si Solo SVGA, Parlamento Hubenil, Scout Association of Trinidad and Tobago y Interamerican Scout Bureau pa nan sosten y colaboracion. Un agradecemento special ta bay na tur lidernan Scout, colaboradornan y voluntarionan cu nan dedicacion y creatividad a haci e evento posibel.

   E colaboracion aki ta crea espacio pa hobennan descubri nan potencial, enfrenta desafio cu confianza y reconoce e balor di apoya otro. E leccion di Mind Builders ta cla: un mente fuerte no ta esun cu nunca ta faya, sino esun cu ta sigui siña, adapta y crece, hunto cu otronan.