Premier Eman ta na Hulanda buscando forma pa transforma maneho di sushi na Aruba

Ta explora aliansa entre Serlimar, Selikor, Selibon, EcoTech y HVC

• Nan ta pensa di uza tereno di refineria pa esaki 

ORANJESTAD (AAN): Prome Minister Mike Eman ta explora e posibilidad di uni experencia y conocemento di e empresanan di maneho di sushi na Aruba, Corsou, Boneiro y Hulanda, cu e meta di desaroya un solucion regional pa e problematica di sushi. E vision aki a sali dilanti durante su bishita na empresa HVC na Alkmaar, Hulanda.

   E prome minister, acompaña pa su delegacion, a ricibi un recorido den e instalacionnan di HVC, caminda el a cera conoci di cerca e sistema moderno cu e empresa ta uza pa procesa sushi, recupera material y produci energia electrico y calor. Eman a expresa su impresion positivo di e nivel di organisacion, tecnologia y eficiencia cu el a observa durante e recorido. Segun e prome minister, e tipo di instalacion aki ta representa e nivel di modernisacion cu Aruba y e otro islanan den region mester aspira na dje, asina por atende e problematica di sushi na un manera mas eficiente y responsabel cu medio ambiente.

   Cooperacion entre Aruba, Corsou y Bonaire: Durante e encuentro, Eman a haci referencia na su bishita reciente na Corsou y Boneiro, caminda e posibilidad di un acercamento regional den maneho di sushi a wordo discuti. Un di e aspectonan cu e prome minister ta considera importante ta e volumen di sushi cu ta necesario pa haci un instalacion industrial moderno economicamente factibel.

   Pa e motibo aki, Eman ta explora si Aruba, Corsou y Boneiro por uni nan esfuerso y crea suficiente capacidad regional pa un proyecto di e magnitud aki. Den e contexto aki, el a menciona e posibilidad di un asociacion entre Serlimar di Aruba, Selikor di Corsou, Selibon di Boneiro, EcoTech na Aruba y HVC. E idea ta pa combina e conocemento cu e empresanan local tin di e realidad y necesidadnan di cada isla, cu e experiencia tecnico y industrial cu HVC a acumula durante 35 aña.

   Eman a destaca cu e posibilidad aki mester wordo investiga, pero cu cooperacion entre e diferente partner por habri porta pa un modelo nobo di maneho di sushi den region.

   Area di refineria como posibel luga pa industria nobo: Un otro punto importante cu Prome Minister Eman a presenta ta e posibilidad di considera e area di refineria na Aruba pa desaroyo di un instalacion moderno di procesamento di sushi. E prome minister a haci referencia na e tecnologia sofistica cu el a observa na HVC, caminda diferente proceso industrial ta wordo organisa den un sistema integra.

   E tipo di instalacion aki por ofrece oportunidad pa procesa y separa diferente clase di sushi, recupera materia prima y transforma sushi cu no por recicla den energia.

   Pa Aruba, un proyecto di e tipo aki lo por representa algo mas cu solamente un solucion pa e problematica di sushi. E lo por habri posibilidad pa un actividad economico nobo, basa riba tecnologia, innovacion y produccion di energia. Sin embargo, e prome minister a laga cla cu e posibilidad aki ainda mester wordo investiga, incluyendo e factibilidad di un cooperacion entre e diferente empresa.

   Transforma un problema den un oportunidad: Durante su recorido, Eman a presta atencion special na e manera cu HVC ta procesa sushi den un ambiente industrial controla, incluyendo e medidanan pa limita molestia di holo y otro efecto relaciona cu procesamento di sushi. E prome minister a considera impresionante e manera cu e diferente instalacion ta funciona den un sistema organisa, caminda sushi ta wordo trata como un material cu ainda por genera placa.

   E experencia na Alkmaar ta mustra e posibilidad di transforma maneho di sushi den un actividad industrial cu ta combina proteccion di medio ambiente cu desaroyo economico. Na final di e bishita, Prome Minister Eman a expresa su agradecimento na Douwe van der Vaart y HVC pa e informacion comparti y e oportunidad di conoce e instalacionnan. El a destaca e importancia di mantene e dialogo habri pa determina si HVC eventualmente por participa den e buskeda di un solucion regional pa Aruba, Corsou y Boneiro.

   Cu e bishita aki, Gobierno di Aruba ta sigui explora posibilidadnan di cooperacion internacional cu por contribui na un sistema moderno y sostenibel di maneho di sushi, mientras cu ta crea oportunidad nobo pa futuro economico di Aruba.