Gobernador a ricibi prome buki pa mucha di ‘Kinderboekenweek’

ORANJESTAD (AAN): Gobernador Alfonso Boekhoudt recien a ricibi señora Astrid Britten, directora Biblioteca Nacional Aruba, pa un audiencia.

   Durante e bishita aki Gobernador a haya e prome ehemplar di e buki pa mucha di Kinderboekenweek, cu lo keda regala na muchanan den cuadro di e festival di buki edicion 34.
   E aña aki e regalo di e Kinderboekenweek ta un buki di prenchi cu e titulo “Rashi Curashi ta haya curashi!”, skirbi door di e escritor Arubiano Daylan Krozendijk, docente di drama na Instituto Pedagogico y ilustra door di illustrado Hulandes Petra Heezen.
    Sr. Krozendijk a compaña Señora Britten durante e audiencia.
   E tema actual di e festival di buki pa mucha ta “Spot aan!”, traduci na Papiamento como “Luz, Camara, Accion!”.
   E apertura oficial di e festival di buki pa mucha, edicion 34 ta tuma luga diabierna 30 di October 2026 na Biblioteca Nacional den George Madurostraat.  E potret aki pa cortesia di Kabinet Gouverneur Aruba.