Ainda den Corte no por keda cla cu caso penal contra chauffeur cu a bolter cu Skyline na Malmok matando un dama

Dos aña despues di e accidente fatal

ORANJESTAD (AAN): Recien den Corte di Husticia a sigui cu tratamento di un lamentable caso di accidente cu a sosode 7 Juli 2024, caminda N.T. tabata maneha un Nissan Skyline cu a bolter net na e final di caminda di Malmokweg ta caba y bira bay Westpunt, y a parti den dos cerca di e cura di Tierra del Sol, den cual e dama hoben Dariana Heredia Perez a fayece. Den sala di Corte tabata presente mayornan di e defunto y mayornan di N.T.

   Caso na October 2025:  Na October 2025 tratamento di e caso a tuma lugar caminda Fiscal ta acusa N.T. cu dia 7 Juni 2024 a causa un accidente na Malmok door di cual e dama Dariana Heredia Perez a fayece. E auto Skyline a bolter y parti den dos door di velocidad halto.

   Durante tratamento di e caso, e acusado N.T. a bisa Hues cu nan tabata na Arashi ta come y na dado momento e Dariana a bisa cu e ta mira spiritonan rond di e auto. Esey a pone cu nan a core bay for di e lugar pero na dado momento e velocidad di e auto a sigui subi y N.T. no por a para e auto. El a bisa Hues cu e tabata primi duro riba e pedal di brake pero e auto no kier a para.

   Fiscal: Na opinion di Fiscal, N.T. ta bisa cu door di spirito, el a core duro. Fiscal ta kere cu por bien ta cu door cu N.T. a hera dal contra un patruya di Polis y Polis a core su tras cu luznan di alarma sendi, N.T. tabata core duro. Fiscal a mustra cu segun N.T., e no a mira e auto di Polis. Fiscal a bisa cu tur chauffeur mester sa cu core riba di 150 km/h ta peligroso.

   N.T. tabata sa cu e auto tabatin problema y core mas cu 150 km/h ta un riesgo. Fiscal ta haya cu door cu N.T. a core iresponsabel, a causa morto di e victima. El a bisa cu N.T. a keda afecta y ta hayando tratamento di psicologo. Fiscal a exigi 6 luna di prizon pa N.T. y 2 aña sin rijbewijs. Tambe Fiscal a exigi pa confisca e auto.

   Pa loke ta e demandanan di daño, Fiscal a bisa cu e gastonan di entiero ta acceptable. Fiscal a bisa cu e no ta haya suficiente argumenta e placa cu e defunto tabata contribui. Fiscal a sigui bisa cu e ta haya cu tin diferente cos cu no a wordo splica bon pa cu e demandanan. Pa loke ta e demanda di e mama di 30 mil, Fiscal a bisa cu e ta laga na decision di Hues. E placa di pasashi di e ruman muhe, ta acceptable. E demanda di e rumannan, Fiscal ta laga na decision di Hues y a exigi pa pone medida di pago.

   Abogado: mr. Edwards ta haya cu e accidente no tabata door di culpa di N.T. sino cu ta e mecanismo di e auto a daña y N.T. no por a para e auto mas. Na opinion di abogado, N.T. a haci tur loke ta posibel pa controla e auto y no a dal contra ningun auto of cura.

   E ta haya cu mester conclui cu N.T. no por a controla e auto mas door cu e mecanismo a daña y no por papia aki di cu N.T., a core iresponsabel. E abogado a pidi Hues pa declara N.T. liber di e acusacion di culpa.  mr. Edwards a bisa Hues pa tene cuenta cu N.T. a keda afecta y pa resto di su bida e lo mester carga cu el a perde un amiga. E abogado ta haya cu falta mas investigacion riba kico realmente por a spera ora cu e throttle body a daña y cual otro partinan di e auto lo a keda afecta door di esaki.

   Hues a habri investigacion: Na November 2025, Hues a bisa cu e ta haya cu e investigacion no tabata completo. Hues a mustra cu N.T. a declara cu diripiente e Nissan Skyline a subi di velocidad y N.T. no por controla e auto. Tambe Hues a mustra cu N.T. a bisa cu anterior esaki a yega di sosode. Ta asina cu dos garashi a evalua e Electronic Control Unit (ECU) pero no por a ‘lesa’ esaki.  E computer ECU no ta controla fluho di gasoline sino aire. Asina e tecniconan di Topcar NV a bisa den su rapport.

   Hues ta haya cu no a haci mas investigacion pa check e throttle body. Hues kier pa un experto evalua si enberdad cu ta door di fayo tecnico e accidente a sosode. Hues a habri investigacion y a instrui Hues Comisario pa laga haci mas investigacion.

   Na 2026 ainda no tin claridad:  Ademas di esey, recien un otro Hues a tuma e caso pasobra e Hues anterior a bolbe Hulanda. Hues a bisa cu Instituto Forense na Hulanda (NFI) na Januari 2026 a laga sa cu e investigacion no por keda realisa pasobra e ta dura largo y e chens tey cu e no tin resultado. E auto ta procedente di Japon y no por haci cierto investigacion.

    Hues a bisa cu awor lo bay sigui, caminda a keda cu e caso y no ta bay trata henter e caso di nobo. Hues a bisa cu e discusion den e caso aki ta si ta un fayo mecanico a causa e accidente y un investigacion mas profundo no a duna resultado. E discusion ta riba fayo cu e Throttle body. Hues a bisa cu e mes a bay check riba internet y a constata cu por sosode cu e Throttle body por aumenta velocidad diripiente pero ta stabilisa su mes di biaha.

   Hues a puntra N.T. si por ta cu N.T. tabata core duro y cu diripiente a surgi daño na e Throttle body. N.T. a bisa Hues cu e kier haci uso di su derecho di silencio. Hues a puntra di con. N.T. a bisa cu e caso ainda ta traha hopi riba dje y e no kier bisa nada mas. Hues a haci algun pregunta mas pero a mira cu N.R. a cuminsa yora. Hues a puntra si N.T. ta bao tratamento di psicologo. N.T. a bisa cu 1 vez pa luna of 2 vez e ta bay psycologo. Hues a bisa cu anterior Fiscal a exigi castigo di prizon y kita rijbewijs pa un tempo. El a puntra N.T. kico e ta pensa di esey. N.T. a bisa cu esey lo ta hopi dificil p’e y su famia. E tin un yiu di 2 aña y e ta hiba e yiu unda e tin cu bay y e ta traha.

   Fiscal kier mas investigacion: Fiscal a bisa Hues cu 6 November 2025 Hues a habri e caso pa mas investigacion riba e Nissan Skyline pa mira si tabatin fayo cu e Throttle body. Fiscal a bisa cu lesa e computer no ta duna un resultado completo. Fiscal a bisa cu e kier pa manda e caso bek Hues Comisario pa laga check si for di computer cu por surgi problema cu e Throttle body y si por mira esaki riba e computer di e auto. E kier sa si e velocidad di mas o menos 155 km/h lo por a wordo causa di otro mechanismo di e auto. Fiscal a bisa Hues cu e ta realiza cu e caso a dura hopi pero e famia di e victima y e sospechoso kier un fin na esaki.

   Abogado: mr. Edwards a bisa Hues cu durante tratamento di e caso aña pasa, N.T. a contesta tur pregunta di Hues. A sali na cla cu tabatin un serie di problema na e auto. E ta haya cu e comentario riba analisis di NFI hopi vago. Esaki ta keda causa dolor na N.T. y famia. E abogado a bisa cu e no tin nada contra si Hues dicidi pa sigui haci mas investigacion.

   Hues a bay evalua un rato y a dicidi cu ta necesario pa haci mas investigacion. Hues a bisa cu e ta hopi fastioso pa e sospechoso y famia di e victima. Sinembargo mester tin claridad pa por tuma un decision.

Hues a dicidi cu a caso ta keda pospone atrobe. E kier haya claridad, si e auto lo por subi di velocidad asina. E caso a keda pospone pa tempo indefini.

   Den pasado DIARIO a yega di publica, cu hasta si e pedal di throttle keda pega door di un obheto, of e throttle body bao di hood a keda mal pega... e sistema di brake di un auto a wordo construi pa genera aun mas forza pa stop e auto, ni maske e motor ta generando forza te na su maximo.  “Brakes will always overpower the engine”.

.