Coleccion Aruba a haci un tremendo trabao pa conserva Papiamento

Parlamentario Xiomara Maduro

ORANJESTAD (AAN): Preserva Papiamento ta preserva un parti esencial di Aruba. Nos idioma ta carga nos historia, nos cultura y nos manera di expresa nos mes. P’esey, ta importante cu nos materialnan na Papiamento — buki, corant, manuscrito y grabacionnan — no solamente keda warda, sino cu nan ta accesibel pa nos comunidad y pa generacionnan futuro. 

Den su articulo “Preserving Papiamento-Safeguarding Aruba's Language and Cultural Heritage,” publica den e publicacion di Internet Archive Vanishing Culture: A Report on Our Fragile Cultural Record na 2026, Sr. Peter Scholing di Biblioteca Nacional Aruba ta splica e importancia di preservacion digital. E articulo ta destaca con e colaboracion entre e comunidad di herencia cultural di Aruba y Internet Archive ta yuda conserva y habri material historico. Tecnologia pa busca texto ta haci cu palabra y frase den documentonan historico por wordo haya mas facilmente, y ta habri oportunidad pa investigacion y enseñansa.  

E historia di Coleccion Aruba ta cuminsa cu e trabou di digitalisacion di Biblioteca Nacional Aruba. Durante e pandemia, e colaboracion cu Internet Archive a crece. Na oktober 2022, Archivo Nacional Aruba, Biblioteca Nacional Aruba y UNOCA a firma un acuerdo pa traha hunto na digitalisacion di nos historia, cultura y herencia. Dia 28 di september 2023, e portal Coleccion Aruba riba www.coleccion.aw a wordo lansa oficialmente.  

Desde e inicio, mas institucionnan a uni na e iniciativa. Asina, Coleccion Aruba a bira un portal digital cu ta reuni material documental y audiovisual di Aruba y ta pone esaki na alcance di hende local y di henter mundo. E colaboracion cu Internet Archive ta fundamental pa preserva e material y haci esaki accesibel online.  

E trabou di Aruba a ricibi reconocemento internacional tambe: na 2024, Aruba a gana e Internet Archive Hero Award pa e trabou innovativo di Coleccion Aruba pa preserva y pone nos herencia cultural online. E premio ta reconoce e esfuersonan hunto di e plataforma y su partnernan. 

Esaki ta un logro importante pa Aruba pasobra cada documento, buki, pagina di corant of grabacion cu nos conserva ta yuda mantene nos memoria colectivo bibo. Y pa Papiamento, presencia den e mundo digital ta habri mas oportunidad pa nos idioma sigui wordo lesa, studia, investiga y comparti, awor y den futuro.

Parlamentario Maduro ta gradici señor Peter Scholing pa su articulo y pa comparti e trabou importante di Biblioteca Nacional Aruba y e partnernan di Coleccion Aruba.