Miembro di Wardacosta condena pa horta motor di boto

El a purba di bay pisca calco tambe

• El a haya castigo di trabao pa comunidad
• Tempo di prueba di 1 aña 

ORANJESTAD (AAN):  E miembro di Wardacosta, e homber E.F., Diahuebs mainta a wordo condena na trabao pa comunidad y un castigo condicional. Hues a bisa cu e castigo cu Fiscal a exigi esta trabao pa comunidad, no ta refleha seriedad di e caso y pesey a pone acerca e castigo condicional.

   Exigencia di Fiscal: Dia 17 di September 2026 tratamento di e caso a tuma lugar, caminda Fiscal ta acusa E.F. di malversacion di motor di un boto na cuartel di Wardacosta, ladronicia y viola ley di arma, di a pisca calco cu ta protehi pa ley na 2025.

   Fiscal ta haya E.F. culpabel di e acusacionnan y a mustra cu un empleado di Wardacosta, ta viola ley. Pa cu e castigo, Fiscal a bisa cu e ta tene cuenta cu esaki ta un caso bieu cu a crece for di un otro caso. Fiscal a tene cuenta cu E.F. a abusa di su posesion, envez di duna ehempel. El a exigi 100 ora di trabao pa E.F.

   Sentencia: Diahuebs mainta E.F. door di ta malo no a presenta den Corte. Su abogado mr. Carlo si tabata presente. Hues a bisa cu e ta declara E.F. liber di e acusacion di labamento di placa di municion, y pisca calco. Hues a bisa cu na Wardacosta no tin maneho estableci kico ta haci cu municion y flare cu a caduca.

   Hues ta haya cu no por bisa cu e municion tabata malversa. Tambe e piscamento di calco tampoco no a keda proba. Hues a bisa cu tin chat cu E.F. ta papia di piscamento di calco pero no tin ningun indicacion cu el a pisca.

   Culpabel di a horta motor di boto:  Hues a bisa cu e ta haya proba cu E.F. a horta motor di boto na Wardacosta. Hues a mustra cu tin chat caminda E.F. ta bisa un amiga cu el a horta un motor di boto na Wardacosta.

   Despues E.F. a bisa e amiga cu e mester a hiba e motor bek. Hues a sigui bisa cu tambe tin chat cu na hefe den Wardacosta P., E.F. a bisa cu hunto cu L. a horta motor y P. a bis’e trece e motor bek. Hues a bisa cu e no ta kere declaracion di E.F. cu e no a horta sino cu a bay pone e motor pa test riba un otro boto.

   Purba di pisca calco:  Hues a bisa cu tambe e ta haya proba e purba di pisca calco. Hues a mustra cu tin chat entre E.F. cu M. caminda nan ta papia di bay pisca calco pero E.F. no a bay. Pesey Hues ta considera cu esaki ta purba di pisca calco.

   Castigo: Hues a tuma na malo cu E.F. kier a bay cu un motor y tambe cu e kier pisca calco, siendo cu ta E.F. su deber pa cuida calco cu ta protehi.

   Hues ta haya cu e castigo exigi pa Fiscal no ta mustra e seriedad di e caso. Hues ta haya cu ta importante pa manda señal cu no tolera esaki. Hues a confirma e 100 ora di trabao pa comunidad y si E.F. no cumpli e lo mester bay 50 dia sera. Hues a pone acerca, un castigo condicional di 1 luna di prison cu un tempo di prueba di 1 aña.