Congreso organisa pa FEPOH a mustra e reto y solucionnan relaciona cu trastorno di desaroyo di idioma

Minister Gerlien Croes:

ORANJESTAD (AAN): Minister Gerlien Croes como Minister di Educacion tabata presente na e congreso importante di Entrenamento di Apoyo pa TOS (Trastorno di Desaroyo di Idioma), un iniciativa organisa conhuntamente pa Foundation for the Hearing Impaired Aruba (FEPOH) y ministerio di educacion, bou capa di Learning Cities Aruba. Pa medio di seminario aki, Minister Gerlien Croes a subraya e compromiso cu un enseñansa inclusivo y e apoyo continuo na e bienestar y desaroyo di tur studiante na Aruba.

E evento aki ta diseña pa capacita profesionalnan di educacion y conscientisa e comunidad general tocante e e retonan y solucionnan relaciona cu trastorno di desaroyo di idioma.

Dia 5 di October – Conferencia di Desaroyo Profesional pa Educadornan:
Un dia dedica exclusivamente na educadornan pa asina nan por adkiri conocemento pa identifica y apoya studiantenan cu TOS den e ambiente escolar. E sesion aki a enfoca riba strategianan pedagogico y metodonan practico pa uza den klas.

Dia 6 di October – Congreso Nacional di Trastorno di Desaroyo di Idioma (Publico):
Un congreso habri pa henter comunidad, unda cu lo profundisa den e tema di TOS, brinda informacion balioso y ofrece hermentnan practico pa uza na cas y den comunidad. E ta un espacio ideal pa intercambia experiencia entre profesionalnan di enseñansa, famia y publico en general.

E conferencia aki ta representa un oportunidad unico pa sigui fortalece e red di apoyo pa nos muchanan y hobennan. E evento aki ta completamente gratis pa tur participante.

Minister di Educacion ta gradici FEPOH conhuntamente cu Learning Cities Aruba pa organisa e congresonan aki. E topico aki ta uno sumamente importante y central pa crea un sistema di educacion mas inclusivo pa un y tur.