AVP a reconoce René “Baba” Herde, Lorna Varlack y Norman Roos

ORANJESTAD (AAN):  Durante Congreso AVP 2026, celebra na Marriott Ballroom, lider di fraccion parlamentario Jennifer Arends-Reyes a dirigi

un momento di reconocemento pa coleganan di partido René Gervais “Baba” Herde, Lorna Varlack y Norman Roos, como miembronan honorario di conseho di e partido. E homenahe a reconoce nan añanan di entrega, contribucion y compromiso cu AVP y cu pueblo di Aruba.

Den su discurso, Arends-Reyes a destaca cu e historia di un partido ta wordo construi door di hende cu ta dedica nan tempo, energia y conocemento na un causa comun. El a describi e tres homenaheado como pilarnan di AVP, cu nan trayectoria a laga un marca den e organisacion y den bida di esnan cu a comparti e caminda cu nan.

“Tin momentonan den bida di un partido cu nos mester para un rato pa reconoce e hendenan cu a yuda construi su historia. Awe ta un di e momentonan especial ey,” Arends-Reyes a expresa.

Pa e lider di fraccion, e homenaje tabatin tambe un significado personal. El a comparti cu e oportunidad di traha hunto cu Baba, Lorna y Norman como colega di partido y den Parlamento, y di siña di nan contribucion na enseñansa, a forma parti di su propio caminda di formacion.

“Cada uno di boso, den boso propio manera, a contribui na mi formacion y na mi comprension di e responsabilidad cu servicio publico ta trece cu ne. Mi ta carga e enseñansanan ey cu mi te awe,” el a señala.

Arends-Reyes a subraya cu den politica, aprendisahe ta tuma lugar door di preparacion, scucha y debate, pero tambe door di e ehempel di coleganan cu experiencia: con nan ta enfrenta retonan, defende nan conviccionnan y sigui traha den momentonan dificil. El a gradici e tres homenaheado pa e intercambionan, experiencianan y enseñansanan cu nan a comparti cu ne.

Den e contexto di e Era di Relevo cu AVP ta biba, Arends-Reyes a pone enfasis riba e balor di pasa conocemento y experiencia di un generacion pa otro. Mira dilanti cu energia y ideanan nobo ta cana hunto cu honra e trabou di esnan cu a trece e partido te na e momento actual.

“Un partido ta crece cu e esfuerzo di diferente generacion. Cada generacion ta aporta algo, y cada generacion tin e deber di pasa su conocemento y experiencia pa esnan cu ta sigui,” el a afirma.

Durante su intervencion, Arends-Reyes a reconoce tambe tur lider anterior di AVP y a expresa un gradicimento special na lider di Partido Mike Eman pa su compromiso di tanto aña cu Aruba y su pueblo. Na e congreso, caminda liderazgo di e partido a pasa di Mike Eman pa Wendrick Cicilia, el a desea e lider nobo sabiduria y guia di nos Creador pa e responsabilidad cu ta dilanti.

Arends-Reyes a cera cu un mensahe di gratitud na Baba, Lorna y Norman: “Boso contribucion tin balor. Boso historia tin un lugar den AVP. Y boso ehempel ta sigui inspira nos pa sirbi Aruba cu seriedad, humildad y amor pa nos pueblo.”

E reconocemento como miembronan honorario di conseho ta honra nan legado y ta reafirma e aprecio di AVP pa nan entrega y pa e enseñansanan cu ta sigui guia e siguiente generacion.