Diabierna ta trata caso penal contra muhe hoben Fernandes Pedra

Sospecha di a mata dos hende cu Jeep Compass y core bay...

ORANJESTAD (AAN): Na Augustus 2026, Hues a pospone e caso penal contra Chania Chante Fernandes Pedra di 24 aña pa asina e sospechoso por haya asistencia di abogado for di Curacao. Hues a fiha cu Diabierna 2 October 2026, tratamento di e caso ta tuma lugar.

   Acusacionnan: Na luna di Augustus, Fiscal a presenta e acusacionnan contra Fernandes Pedra cu ta:

(*) Dia 4 Januari 2025, a dal mata e dama Josely Paulina Vasquez Gonzalez di 65 aña, y su pareha Carlos David Vialez Valerio di 54 aña y sigui core bay.

(*) Fiscal a sigui bisa cu Fernandes Pedra ta wordo acusa di tabata core e SUV modelo Jeep Compass color preto sin rijbewijs, core bou influencia, core cu velocidad halto y den un situacion emocional.

(*) Fiscal tambe a bisa cu Fernandes Pedra ta wordo acusa di intento di mata di otro dos peaton, esta señora Williams y e homber Fernandes Rivas, kendenan tambe e momento ey tabata cruzando e caminda tambe.

   Abogado di Corsou: Hues a bisa cu tin mail di Fiscal cu ta bisa cu a purba haya asistencia di abogado di Aruba pa defende Fernandes Pedra. For di Orden di Abogado di Aruba, por a compronde cu no tin abogado cu lo kier ta dispuesto pero tin dos abogado for di Curacao cu ta dispuesto.

   Fiscal a bisa cu Departamento di Asuntonan Social a informa cu no tin informacion pa gastonan di estadia di e abogadonan di Curacao. Fiscal ta haya cu Hues lo mester tuma un decision riba esaki.

   Hues a mustra cu segun ley, e gastonan di honorario di abogado, estadia lo mester wordo cubri door di Gobierno di Aruba.

   Rapport di Psicologo no ta cla: Hues a bisa cu el a haya un mail di psicologo Boekhoudt kende ta splica cu lo bay tuma mas tempo promer cu e raport di evaluacion di Fernandes Pedra ta cla. Esaki door di e estado emocional di Fernandes Pedra. E psicologo ta calcula cu e mester 3 siman mas.

   Fiscal a reacciona: Ta asina cu e acusado Fernandes Pedra den su peticionnan ta pidi entre otro pa e bay liber te ora di tratamento di e caso. Tambe e ta pidi pa scucha e dos peatonnan como testigo. Tambe e ta pidi pa reconstruccion di e accidente.

   Fiscal a bisa cu e no ta haya cu por laga Fernandes Pedra liber. El a mustra cu investigacion for di Hulanda ta mustra e comportacion di stuur sumamente peligroso di Fernandes Pedra cu a causa morto di dos hende. Fiscal a mustra cu pa e delito cu Fernandes Pedra a haci, tin un castigo di 8 aña di prison. Fiscal ta haya cu comunidad lo no gusta cu Fernandes Pedra lo wordo laga liber. El a remarca cu no tin situacionnan personal cu a wordo presenta cu ta mustra cu mester cambia di opinion. Tambe Fiscal a mustra cu e imagennan di video ta mustra bon cla kico a sosode y no ta haya cu mester haci reconstruccion di e accidente.

   Pa loke ta peticion pa scucha e testigonan, Hues a mustra cu psycologo ta mustra cu e testigonan lo core peliger si nan mester bolbe wordo scucha como testigo. Hues ta haya cu tin tur imagennan di video cu ta mustra tur cos. Hues ta haya cu ta suficiente pa a scucha e testigonan na Hues Comisario.

   Sospechoso a keda den prizon: Hues ta haya cu tin motibonan di peso, teniendo na cuenta cu e raportnan nobo cu tin awor. Na opinion di Hues, teniendo cuenta cu pa e delito tin castigo di 8 aña di prison y a shock comunidad, no por laga e hoben Fernandes Pedra liber awor.

   Lo pasa video di accident den Corte: Hues a bisa cu e idea ta pa dia 2 October 2026, durante tratamento di e caso, lo pasa High Definition Security-video di loke a pasa. Hues a sigui bisa cu si famianan di victimanan ta haya cu esaki ta pisa, nan lo por sali pafor di sala di Corte un rato.

   Diabierna 2 October pa 8.30 am e tratamento di e caso ta tuma lugar y DIARIO lo informa kico Fiscal ta pensa di e caso, kico ta e defensa di abogado.