Boto cu hendenan indocumenta aden tabata drief dilanti San Nicolas

Tur tres tabata Dominicano

ORANJESTAD (AAN): Tabata Diahuebs 24 di September, cu Wardacosta di Caribe Hulandes a ricibi un yamada for di un persona cu a tuma nota di movimentonan straño riba lama. Tabata trata di un boto den vecindario di Rodgers Beach cu tabata drif riba awa.

    Inmediatamente a pidi pa personal di Wardacosta na Savaneta pa sali den direccion di e boto. Miembro nan di Centro Maritimo Operacional na Corsou tambe a pidi asistencia di un di e unidad nan di helicopter pa duna sosten for di aire.  
   Na momento cu a yega cerca di e boto, e personal di Wardacosta a tuma nota di tres persona indocumenta abordo. E siguiente paso tabata pa conduci un investigacion riba e boto. E proceso aki a tuma luga na Steunpunt di Wardacosta na Savaneta. Despues di investigacion preliminar aki a resulta cu e personannan ta di nacionalidad Dominicano.
   Hunto cu asistencia di Unit Mensenhandel en Mensensmokkel (UMM) y tambe K-9 Unit di KPA a haci un control riguroso riba e boto y a bin na conclusion cu no tabata tin nada particular riba e boto mes. E tres personanan a ser entrega na Guarda Nos Costa cu hunto cu UMM lo continua cu e paso nan necesario pa atende cu e tres personanan.