Aeropuerto di Aruba kier crea su mesun Cuerpo di Bombero

Diego de Cuba di Sindicato STA a divulga

• Sindicato STA ta para tras di e idea aki tambe
• E ta un exigencia di ICAO pa Aeropuertonan 

ORANJESTAD (AAN): Den un entrevista cu Diego de Cuba di Sindicato STA, el a splica cu recien cu a tene reunion cu Aruba Airport Authority, y aki nan CEO, esta Jonny Andersen tabata sinta na mesa, y el a expresa e deseo di Aeropuerto pa nan busca nan mesun Cuerpo di Bombero pa AAA NV pa keda staciona na pista.

    Segun e lider di STA, loke e CEO a trece eynan tin su validez. Pasobra un aeropuerto internacional manera Aeropuerto Reina Beatrix conforme e exigencianan di ICAO cu ta International Civil Aviation Organization, nan ta bisa bo tambe den e Annex 14 volumen 1, capitulo 9.2, cu un Aeropuerto mester tin su propio Rescue y Firefighters ariba aerodrome.  Loke awo aki tambe te esey, pero tur hende sa cu e Brandweer ta separa for di AAA N.V.

    Pero awo aki Aeropuerto di Aruba kier bin cu su propio Cuerpo di Bombero, y loke ta conforme exigencia di ICAO, esey ta necesario y e Aeropuerto mester tin su mesun unidadnan di Bombero.

   Pero na Aruba, a haci uzo semper di Brandweer di pais Aruba pa ta localisa eynan, pero eigenlijk un Aeropuerto internacional manera Reina Beatrix mester tin su propio cuerpo di bombero.

   E asunto aki, segun De Cuba, ta algo cu mester wordo regla mas pronto posibel.  den nos concepto di estado mas pronto cu ta posibel. Nos no sa cuanto el a bay pisa ariba e presupuesto di Aeropuerto, pero cual bon, awo aki nan no ta pa nada e e hende nan eynan. Cual bon, tin cierto gastonan cu Triple A ta paga, Brandweer tambe pa por ta presente eynan na Aeropuerto.

   Anto awo aki e momento a yega cu Aeropuerto tin su propio Cuerpo di Bombero.  E ta un pensamento cu Sindicato STA lo para su tras, definitivamente pasobra e ta yuda den certificacion di Aeropuerto.

   Ora cu ICAO ta bay certifica un Aeropuerto internacional manera esun di Aruba, bo mester tin tur e exigencianan poni den rij ta cumpliendo cu nan, y aworaki mes Aviacion Civil (DCA) sa bon cu e ta un exigencia.

   Diego de Cuba a splica cu esey ta loke Sindicato STA a yega di ‘hammer’ riba dje, y cu e ta kere cu esey a cost’e su trabao ora cu el a trece cosnan dilanti cu no tabata bay bon.  “Y nan a conspira contra mi y kitami di trabao.  Anto mi a trece cosnan aki dilanti, y awor despues tur a sali na cla,” de Cuba a indica.

   El a mustra con na aña 2023, AAA NV practicamente tabata den non-compliance riba 141 punto, y esey ta hopi.

  AAA NV a core haci coreccion, y na aña 2024 nan a baha e non-compliance te na 58.  Na 2025 a sigui baha e non-compliance te na 53 punto.

   “Anto mi ta bisa e cosnan aki pa un aeropuerto manera Reina Beatrix no por.  Pues mester keda al tanto cu tur punto ta wordo cumpli cu ne, y esey ta algo cu Jonny Andersen ta keda enfatiza riba dje, y Sindicato STA ta completamente di acuerdo cu esey, pasobra e ta bon pa Aeropuerto su funcionamento.

   Corda cu aki na Aruba, nos ta depende di turismo y bo mester tin un aeropuerto cu ta cumpli cu tur regla internacional ‘in and out’, paso  no mester lubida cu tin tin FAA tambe y bo tin e US Customs cu US Immigration tambe aki nan cu bo tin cu cumpli tur e reglanan.  Corda cu di tur turista cu ta drenta na Aeropuerto, 72% ta bin for di Merca, 4% ta bin di Canada, e restonan ta wordo parti, 24% ta parti den otro destinacionnan. Anto bo mester cumpli cu tur exigencianan di e entidadnan aki.  Pues FAA tambe por yega bati na porta, y ta descubri puntonan cu no ta wordo cumpli cu ne.  Pasobra si FAA bisa cu ningun avion Mericano ta ateriza aki, e ora mesora ‘ayo turismo’.

  “Pues bo mester ta hopi cauteloso den bo maneho, pues no djis maneho interno so, bo maneho externo tambe.  Pues aki ta riba bo siguridad, bo safety tambe riba rampa, tur e cosnan eynan,” Diego de Cuba a declara.

   President di STA a admiti cu e no sa si acaso a keda cla cu e audit tumando lugar e dianan aki.  E audit aki lo demostra si Aeropuerto lo haya su certificacion pa 5 aña, of nan lo extende un aña mas atrobe, si acaso nan descubri cu ainda tin hopi punto cu no ta cumpliendo cu nan manera mester ser.