Comision Sokotra ‘Socotoro’ ta comparti historia y identidad di bario cu Prome Minister Eman

Durante Accion di Bario di diahuebs mainta

ORANJESTAD (AAN): Durante Accion di Bario di diahuebs mainta, Prome Minister Mike Eman a haya oportunidad pa conoce mas di cerca e trabou cu Comision Sokotra ta haci pa documenta, conserva y comparti historia di e bario.

Representantenan di e comision a presenta na Prome Minister material cu nan a compila como resultado di un proceso di investigacion, incluyendo informacion haya na Archivo Nacional Aruba. E iniciativa a nace for di un grupo di hende di e comunidad cu a uni cu e deseo di haci algo pa Socotoro y, na mes momento, conoce mas profundamente e historia di nan propio bario.

Segun e investigacion presenta door di Comision Sokotra, pa mitar di siglo 19 e area tabata caracterisa principalmente pa agricultura. Residentenan tabata cultiva, entre otro, bonchi y maishi. Mirando cu Socotoro tabata un area seco, e comision a haya informacion tocante diferente dam cu tabata existi den e bario y cu tabata relaciona cu actividad agricola di e epoca.

Un otro elemento cu a ocupa un luga importante den e historia cu e comision a investiga ta aloe. Segun nan relato, cultivo di aloe a bira parti di actividad agricola y economico den e area, cu agricultornan cu tabata planta e producto y comercialisa e resina.

E investigacion di e comision ta conecta aloe tambe cu e historia tras di e nomber Socotoro, haciendo referencia na isla di Sokotra, den cercania di Yemen, y na introduccion di aloe na Aruba. Despues di tempo, segun e relato presenta, e nomber a evoluciona localmente te bira e Socotoro cu comunidad conoce awe.

For di su pasado agricola, Socotoro a sigui transforma. Mas cas y scol a bin, actividad comercial a crece y migracion for di diferente pais, entre otro Venezuela y Colombia, a contribui na forma un comunidad multicultural. E comision a compila tambe informacion tocante personanan, deportistan, artistanan, negoshinan y otro elementonan cu a forma parti di bida y desaroyo di e bario.

Como parti di nan trabou pa fortalece identidad di Socotoro, e comision ta trahando tambe riba un bandera representativo di e bario, cu elementonan inspira riba aloe y colornan cu carga simbolismo relaciona cu speransa y prosperidad.

Prome Minister Eman a gradici Comision Socotoro pa e iniciativa y a expresa su satisfaccion cu comunidadnan ta organisa nan mes pa investiga y conserva nan historia.

Durante e intercambio, Prome Minister a destaca tambe e conexion historico entre Socotoro, Rancho y Madiki y otro partinan di e area tradicionalmente relaciona cu Playa Pabou. Mas aya di unda exactamente un caya of un limite di bario ta cay, el a pone enfasis riba e relacion y unidad cu historicamente ta existi entre e comunidadnan aki.

Pa Prome Minister, conoce e origen di e barionan y e historia di e famianan cu a forma nan ta un parti importante di identidad di Aruba. Manera el a expresa durante e encuentro: “Historia ta haci nos pais fuerte.”

Premier Eman cu tambe a biba y lanta den e bario di Socotoro pa un tempo, a ricibi un plakaat di reconocimento for di e comision como muestra di nan aprecio.

E encuentro durante Accion di Bario a brinda asina un oportunidad no solamente pa tende necesidadnan actual di comunidad, pero tambe pa duna espacio na iniciativanan cu ta busca conserva memoria, historia y identidad di nos barionan pa siguiente generacion.