Diferente motibo cu a pone casi tur gasto operacional subi na Hospital

Director di Hospital Jacco Vroegop:

• Uno di nan ta gasto pa tratamento di turista
• Otro reto ta aumento di poblacion 

ORANJESTAD (AAN): Durante un entrevista cu DIARIO, Director di Hospital, Jacco Vroegop, a splica cu Hospital ta enfrenta un situacion financiero preocupante. Desde luna di februari, Hospital ta den conversacion intensivo cu AZV y Gobierno pa busca un solucion, despues cu e gastonan di aña pasa a resulta considerablemente mas halto cu e presupuesto acorda.

   Segun Vroegop, e aumento di gasto ta relaciona principalmente cu cuido urgente y necesario cu Hospital no por nenga. Esaki ta inclui, entre otro, parto, weso kibra, accidente di trafico, hemoragia y infarto cerebral, tratamento oncologico y otro condicionnan serio. Hospital a purba cubri parti di e diferencia cu entrada proveniente di cuido brinda na turista, pero esaki no tabata suficiente.

   Durante luna di juni, directiva di Hospital a presenta e situacion na un grupo di mandatario y funcionario, entre nan Minister Presidente, Minister di Asuntonan Economico y Minister di Salubridad. Den e reunion, Hospital a splica cu inflacion y aumento di prijs a causa cu casi tur gasto operacional a subi. Transporte pa avion y barco, medicamento, handschoen, injeccion y otro material medico a bira considerablemente mas caro.

   Ademas, e edificio di Hospital a amplia y ta exigi mas electricidad y mantenimiento. Segun directiva, e gastonan adicional aki no a wordo incorpora suficientemente den e tarifanan actual. Mientras cu costo di operacion ta sigui subi, Hospital ta haya solamente un crecemento presupuestario di aproximadamente dos porciento pa aña.

   Vroegop a enfatisa cu Hospital no ta simplemente pidiendo mas placa. E peticion principal ta pa Hospital wordo paga adecuadamente pa e cuido cu realmente e ta brinda. E meta ta pa ora un ciudadano haya cancer, mester bay den parto, kibra un pia of enfrenta un emergencia medico, e por haya cuido na tempo, cu profesionalnan capacita y materialnan adecuado.

   E Director a señala tambe AZV tin fondo, y ta conoci cuanto placa AZV a genera aña pasa y e aña prome, mientras cu diferente sector di cuido ta enfrenta presion grandi. Esey no ta afecta solamente Hospital, sino tambe cuido mental na Respaldo, cuido pa adulto mayor, dokter di cas y tratamentonan na ImSan.

   Otro reto menciona ta e aumento di poblacion. Den aproximadamente dos aña, cerca di 10.000 persona a wordo legalisa, pero Hospital no a ricibi fondo adicional pa atende e demanda creciente. Si e mesun cantidad di personal, camber y facilidad mester atende mas hende, tempo di espera lo bira mas largo y e presion riba trahadornan lo aumenta.

   Personal di salud ta haci hopi mas cu loke e presupuesto actual ta cubri, pero, segun Vroegop, e situacion no por continua sin solucion. Pa e motibo ey, Hospital ta alerta Gobierno pa tuma accion necesario y urgente.

   HOH su prioridad ta pa mantene un hospital moderno y confiabel, capas di brinda cada pashent na Aruba cuido di calidad, na tempo y cu e recursonan necesario.