Kiwanis Palm Beach Aruba feliz cu nan exitoso Ride4Kids 2026

ORANJESTAD (AAN): E tan spera Ride4Kids den su di seis edicion, tabata un gran exito. 

E actividad aki a tuma lugar Diadomingo cu a pasa, y algun ruta a start ya for di 2’or di marduga for di diferente lugar.

   E evento di Ride4Kids pa 2026, organiza pa Kiwanis Palm Beach Aruba, a topa bek cu tur coredor na final cu tabata 10:00 am na Neptali Henriquez Park na Oranjestad.

    Mirando cu e edicion di ultimo añanan tabata sumamente exitoso, Kiwanis Palm Beach Aruba a bin cu 2026 cu e.o. distancianan disponibel di 175 km, tambe di 150 km, tambe di 125 km, tin di 100 km, 75 km, tambe 50 km, y di 25 km.

   E evento anual aki di Kiwanis Palm Beach Aruba ta encera un buelta completo rond di e isla di Aruba riba bicicleta. Esaki a resulta di ta un manera creativo y innovativo pa recauda fondo pa asina e club por cumpli cu su proposito di yuda comunidad, pero alavez promoviendo un estilo di bida saludabel.  Lo tin parada di awa cada 25 kilometer di e ruta.

   Cada kilometer cu e participante core, ta yuda recauda fondo pa mas di 200 mucha den necesidad.  Bo ta core bicicleta y haci educacion accesibel pa e muchanan aki.  Corda cu tur ganashi lo bay directamente na asisti e muchanan den comunidad.

   Kiwanis Club of Palm Beach ta gradici tur coredor, patrocinador, colaborador, boluntario, y sostenedor.  Danki pa kere den nan causa y haci e evento aki posibel.  E mas grandi satisfaccion ta cu nan a recauda fondo pa yuda muchanan den necesidad rond di Aruba.  Riba e potretnan aki pa cortesia di Kiwanis Club of Palm Beach, por mira mas di e evento exitoso.