Parlamentario Shailiny Tromp Lee a manda carta oficial na Minister Mervin Wyatt-Ras

Tocante e declaracion di Presidente di ABV:

• Cu un serie di pregunta ya cu Gobierno ta duna cero informacion 

ORANJESTAD (AAN)-- Parlamentario Shailiny  Tromp-Lee,  di fraccion di Partido Movimento Electoral di Pueblo “MEP”, a reacciona riba e declaracionnan di e Sindicato den Trahadornan di Cuido di Salud, cual ta representa e trahadornan di Hospital, cu tur hende por a tuma nota di dje, den medionan di comunicacion.

   Parlamentario Tromp-Lee a referi na e declaracionnan haci pa e lider di ABV, Gina Maduro, cu a enfoca riba e situacion financiero y operacional na  Hospital dr. Horacio Oduber.

   “Un declaracion sumamente preocupante,  mirando cu el a keda presenta door di e presidente di e sindicato. Señalnan cu na mi opinion, nos por bisa cu Hospital ta den un crisis alarmante, e ta papia di aumentonan di gasto cu a subi drasticamente, caida di entrada, y cosnan cu no por pasa sin atencion y accion. Prome yama, sigur ta Gobierno, y di parti di Gobierno mi tin cu bisa cu tin cero informacion. Nan no a sali tampoco duna mas informacion despues cu e noticia aki a keda poni den medionan di comunicacion pa ABV. Door cu di parti di Gobierno mes, no ta ricibiendo ningun tipo di informacion ta pone e situacion aun mas den un luz preocupante”, Parlamentario Tromp-Lee a remarca.

   E parlamentario a sigui bisa cu e calidad y continuidad di cuido di salud pa nos pueblo, mester ta garantiza tur momento, y mirando e situacion financiero presenta pa ABV, ta hopi pregunta ta surgi cerca dje, y tambe  hopi preocupacion.

   “Loke sigur a pone mi den e necesidad di actua y a actua tambe, ta e hecho cu a keda informa cu hasta Gobernador a keda informa riba e situacion delicado aki, anto cerca mi, mesora a surgi e pregunta: di con nos di Parlamento mes no a wordo informa di nada? Esaki ta un situacion hopi preocupante. Y pa e motibo aki mes, mi a manda un carta oficial cu un serie di pregunta dirigi na Minister Mervin Wyatt-Ras, pasobra mi ta di opinion cu nos no por permiti cu e pashent y e trahadornan den cuido y pueblo en general, ta keda den incertidumbre. Ora cu nos ta scucha cu gastonan den remedi y material a subi casi 30% y cu gastonan di awa, coriente y mantencion a subi drasticamente, manera cu el a wordo presenta ta un peso hopi grandi riba e presupuesto di Hospital”, e Parlamentario a subraya y e ta bisa cu nan mester di claridad, como miembro di Parlamento.