AZV haciendo varios estudio prome cu dicidi ta duna mas fondo na Hospital

Speranza di lo yega na solucion

• Ta dunando 16 miyon na adelanto caba

ORANJESTAD (AAN): Relaciona cu e situacion ultimo temponan di Horacio Oduber Hospital (HOH), Organo Ehecutivo di AZV a confirma riba Diabierna, cu tanto Ministerio di Salud Publico, HOH y AZV ta na mesa pa lunanan caba pa atende e situacion cu a surgi.

   Como parti di e atencion aki OE AZV desde Februari di e aña aki ta pone recursonan adicional disponibel den forma di adelanto (‘voorschotten’) na balor di 16 miyon Florin pa asina HOH tin mas espacio di liquidez pa por atende e retonan actual.

   Actualmente ta deliberando riba e posibilidad pa duna asistencia adicional den forma di mas adelanto (‘voorschotten’), pendiente e resultadonan di e estudionan cu hunto nan ta haciendo. E estudionan aki ta necesario pa por yega na un solucion structural y duradero pa e situacion.

   Cu e pasonan aki, tanto Gobierno di Aruba como OE AZV ta mustrando un compromiso pa garantisa accesibilidad y continuidad na cuido specialisa den hospital. Nan tin confianza cu, mediante e dialogo constructivo, colaboracion y transparencia entre partidonan lo yega na un solucion duradero pa e situacion na interes general di e aseguradonan.