Minister Dowers a reuni cu President di Corte Comun

ORANJESTAD (AAN): Durante su bishita na Corsou relaciona cu e Justitieel Vierlandenoverleg,

Minister di Husticia, mr. drs. Arthur Dowers, a tene un encuentro cu Presidente di Corte Comun di Husticia, mr. Sigmar Carmelia.

   Durante e encuentro, a hiba dialogo habri y ameno cu e Presidente di Corte Comun den compania di Martin Luttge, Director di Operacion y Kyra de Koeijer, Secretario di e Hunto di Corte Comun.

   Sr. Carmelia recientemente a huramenta y dentro di poco lo keda instala oficialmente como Presidente di Corte Comun di Husticia. E ta asumi e funcion aki reemplasando mr. Mauritsz de Kort, kende desde 2022 tabata ocupa e funcion di Presidente di Hof te cu 2025 na momento cu mr. de Kort a asumi e funcion como Gobernador di Corsou.  

   Minister Dowers ta considera contacto y dialogo cu diferente instancia dentro di e cadena di husticia importante pa mantene un bon relacion institucional y cooperacion entre diferente actor.

   Na final di e encuentro, Minister Dowers a obsekia sr. Carmelia un buki di Johan Hartog tocante historia di Aruba.