Ta invita Empresarionan di Aruba pa expande nan negoshi via Trade Mission na Miami

Tamara Leonard di Camara di Comercio di St. Maarten:

ORANJESTAD (AAN): President di Camara di Comercio di St. Maarten, Tamara Leonard, ta na Aruba pa invita empresarionan local pa forma parti di un Trade Mission na Miami, cu lo tuma luga di 16 te cu 19 di november 2026.

E mision ta habri pa empresarionan aspirante, micro, chikito, mediano y grandi cu ta interesa den expande nan actividad comercial mas leu cu frontera di Aruba y otro islanan di Caribe Hulandes.

Segun Leonard, e meta principal ta pa crea oportunidad pa empresarionan local no solamente importa producto for di Merca, sino tambe exporta nan propio producto y servicio via Miami, cual e ta considera un porta importante pa mercado Americano y internacional.

Durante e mision, participantenan lo haya orientacion tocante diferente paso pa establece presencia comercial na Merca. Leonard a indica cu esaki por inclui proceso relaciona cu registro di negoshi, solicitud di tax ID y posibilidad pa habri un cuenta bancario comercial, dependiendo di e rekisito aplicabel.

Segun Leonard, e Trade Mission ta diferencia su mes di un conferencia of sesion informativo tradicional, pasobra e intencion ta pa participantenan sali cu paso concreto pa por cuminsa opera den e mercado.

Tambe, segun Leonard, participacion den e mision lo brinda acceso na conexionnan cu Greater Miami Chamber of Commerce y otro empresarionan, distribuidornan y actor den sector di importacion y exportacion.

Leonard a destaca specialmente e potencial pa empresarionan den economia creativo, incluyendo productor di cuido personal, moda, joyeria y otro producto local cu tin capacidad pa haya un espacio riba mercado internacional.

Cu su bishita na Aruba, Leonard ta anima comerciante y emprendedor local pa mira e Trade Mission como un oportunidad pa amplia nan red comercial, explora mercado nobo y posiciona producto di Aruba mas aya di nos frontera.

E Trade Mission ta programa pa 16 te cu 19 di november 2026 na Miami.