Criadonan registra por cumpra diferente bestia na Santa Rosa

Randy Maduro  di Santa Rosa:

ORANJESTAD (AAN): Departamento di Agricultura, Cria y Pesca, Santa Rosa a cuminsa cu benta di diferente bestia cu nan tin actualmente disponibel, cu e meta pa crea espacio pa un grupo nobo di bestia cu pronto lo yega for di exterior. 

Relacionista Publico di Santa Rosa, Randy Maduro, a splica cu e benta ta principalmente destina pa personanan cu ta registra na Santa Rosa como criado di bestia. 

Segun Maduro, criadornan cu ta interesa tin oportunidad pa bishita Santa Rosa, wak e bestianan disponibel y scoge e bestia cu nan ta considera mas adecuado. Entre e bestianan cu actualmente ta disponibel tin cabrito, carne y porco. 

Maduro a indica cu Santa Rosa, den combinacion cu minister Geoffrey Wever, ta bezig cu preparacion pa importa bestianan nobo. Pa por acomoda e bestianan cu lo yega, nan a dicidi pa pone parti di e bestianan actual na benta. 

E bestianan ta wordo bendi bibo y pa kilo, y e intencion ta pa cumpradornan hiba nan na nan tereno y sigui cu cria y reproduci. 

Entre e rasanan disponibel tin cabrito Anglo-Nubian, porco Duroc, y carne di rasa White Dorper y Blackhead. 

Maduro a enfatisa cu un rekisito importante pa participa den e benta ta cu e persona mester ta registra na Santa Rosa como criado. E registro ta yuda Santa Rosa mantene un database completo di actividadnan den sector primario di Aruba y, na mes momento, brinda oportunidad pa yuda productor y criador cu diferente servicio. 

Pa registra, personanan interesa mester yena un formulario y entrega documentonan necesario, incluyendo copia di identificacion, informacion tocante tereno y situatieplan. Dependiendo di e situacion, otro documento por ta necesario tambe. 

Maduro a aclaria cu e meta di e benta no ta principalmente pa e bestianan wordo cumpra como mascota. E intencion ta pa nan sigui forma parti di produccion local. 

“E doel ta pa e persona por cumpra, hiba e bestia den su cura, sigui cria nan y asina sigui produci pa abastece Aruba cu carni di cabrito, carne of porco,” Maduro a splica.

Personanan interesa por pasa personalmente na Santa Rosa of por yama 585-8102 pa mas informacion.