Gobierno y UTV’s/ATV’s tour operators a firma protocolo

*Kier fortalece dialogo riba turismo y cuido di naturalesa

ORANJESTAD (AAN): Gobierno di Aruba y seis tour operators a firma diaranson atardi un protocolo di colaboracion pa fortalece e dialogo riba maneho di actividadnan turistico den areanan natural. E acuerdo ta sigui un decision reciente di hues cu a habri caminda pa continua consulta entre Gobierno, operadornan di UTV’s y ATV’s y otro stakeholder.

Prome Minister mr. Mike Eman a indica cu e meta ta logra un balansa entre proteccion di naturalesa y continuidad di actividadnan turistico, conservando patrimonio natural di Aruba mientras turismo ta sigui aporta na desaroyo economico.

Minister di Turismo, Transporte y Labor, mr. Wendrick Cicilia, a destaca importancia di tour operators y tour guides pa e experiencia turistico y necesidad di logra solucionnan sostenibel mediante cooperacion.

Minister di Vivienda, Infrastructura, Servicio Interno y Telecomunicacion, Rene Herdé a agradeci e operadornan cu a firma e protocolo y a enfatisa e compromiso pa sigui dialoga te logra un solucion duradero cu balansa naturalesa, turismo y desaroyo economico.

Cu e protocolo, Gobierno y e tour operators ta reafirma nan compromiso pa traha hunto na conservacion di patrimonio natural y un sector turistico sostenibel pa Aruba.