Inversionnan a wordo haci, hende ta cla pa desaroya y cuminza traha, pero no por sigui pasobra no tin claridad

Elton Arends, OIG, tocante inversion y desaroyo di Oranjestad:

ORANJESTAD (AAN)-- Segun Elton Arends, di  Oranjestad Investors Group (OIG), Gobierno a haci inversionnan hopi grandi añanan pasa, y tur hende por a mira e cambionan den infrastructura cu a tuma lugar, pero desde e tempo ey nada mas a sosode na Oranjestad.

“Un aña pasa, mas of menos, cu un grupo di inversionista, a haci un presentacion na Gobierno, cu nos a kere ta un gran oportunidad pa Oranjestad, pasobra un grupo di inversionista ta para cla, y ainda ta para cla, pa inverti den Oranjestad y kier mira Oranjestad como un caminda unda tur hende kier ta, kier biba, kier pasa un dia, kier bay shop, etc., etc. Nos a reuni cu gobierno, gobierno tabata riba mesun pagina cu nos, pero nada”, Arends a indica.

El a sigui splica cu despues di esaki, inversionnan a wordo haci, inversionistanan a sigui cu e plannan cu nos a presenta, y awe un aña despues, pa motibo cu no tin claridad riba cierto aspectonan den Playa, kico por, kico no por, tin inversionnan pega, inversionistanan cu a inverti caba ta pega.

“Otro proyectonan cu ta na banco y tin nan aprobacion caba, no por sigui pa dilanti, y tin inversionistanan cu ta puntra si nan por sigui warda riba gobierno, pa sigui cu nan plannan. Nos kier a puntra atrobe, pasobra nos a reuni cu diferente minister, despues di un presentacion di un grupo cu a bin di Hulanda pa duna un rapport over di kico nan a pensa cu mester haci na Oranjestad, despues di esaki nos a haci mas hopi pregunta cu respuesta y cu solucion, y nos a reuni cu Minister di Economia pa bise cu ‘esaki no ta loke nos a combersa na cuminzamento’. Minister a bisa nos pa baha e costonan y cu e lo bin cu un contesta pa nos. Augustus a pasa, nos ta na September, y ainda nos no tin contesta”, Elton Arends a señala.

Arends a duna di conoce cu despues nan a reuni cu Minister Presidente, ken a priminti cu despues di recess e lo trece tur e ministernan hunto, pa nan sinta na mesa den forma di dialogo social, pa bin cu un solucion pa e inversionistanan na Oranjestad, pero esaki tampoco a sosode. “Un par di siman pasa nos a sinta cu Minister di Infrastructura, despues cu mi a pone un carta habri den prensa, pasobra nos no por a haya reunion. Nos a sinta cu ne, y nos a sali cu un bon presentimento for di e meeting, el a priminti nos cu den corto tempo, un of dos siman despues, nos lo tende di dje, y cu nos lo wordo anuncia kico e maneho lo ta pa cu Oranjestad y kico lo wordo haci p’e. Ainda nos ta wardando riba esaki, pero nos por warda mas”, Elton Arends, di OIG a relata.

Conclusion: Inversionnan a wordo haci, hende ta cla pa desaroya y cuminza traha, pero no por sigui pasobra no tin claridad!