Barco Hulandes Zr.Ms. Pelikaan a transporta awa di bebe pa area afecta pa desaster na Venezuela

ORANJESTAD (AAN): Riba peticion di autoridadnan Venezolano, e barco di stacion den Caribe Hulandes, Zr.Ms. Pelikaan a

sali for di Corsou riba Diamars rumbo pa e waf Venezolano di La Guaira.  E barco a transporta awa potabel pa Venezuela relaciona cu e dos temblornan devastador cu a socede na final di Juni.

   E barco di sosten Zr.Ms. Pelikaan a transporta 70.000 liter di awa di bebe den su tankinan, hunto cu 150 palet di boter di awa, equivalente na 150.000 liter.  Zr.Ms. Pelikaan ta ekipa cu un grua y un bodega pa carga grandi, esey ta haci di e barco di sosten logistico unu sumamente adecua pa e mision di yudanza aki.

   Na fin di Juni, Defensa Region Caribe a contribui tambe na esfuersonan di yudansa despues di e temblornan na Venezuela. Asina e barco di stacion Zr.Ms. Groningen a transporta decenas di miles di kilo di suministro di yudansa pa e areanan afecta, incluyendo awa di bebe, cuminda y suministro medico pa e heridonan y pa esnan cu a perde nan cas.

   Defensa Region Caribe ta para cla henter aña pa brinda ayudo di emergencia, principalmente na e paisnan di Reino Hulandes, pero, ora ta necesario, tambe na otro paisnan den e region. Esaki ta particularmente importante durante temporada di horcan. Duna asistencia ta un di e tres tareanan nucleo di Defensa den region Caribe.