Awe tin Eclipse Total pero e lo no ta visibel for di Aruba

Jeremio Maduro a indica cu por bay mire online toch

ORANJESTAD (AAN): Manera cu DIARIO a anuncia recien, riba Diaranson 12 di Augustus 2026 lo bay tin un Eclipse Total di Solo cu lo ta haciendo areanan di Groenland, Iceland, Spaña, y tiki di Portugal scur.

   Den un entrevista cu Jeremio Maduro, di e organizacion respeta ‘Space and Nature Aruba Foundation’, el a indica cu e Eclipse di awe lamentabelmente lo no ta visibel na Aruba.  Solamente esnan cu ta den e 4 paisnan menciona na halto lo por experiencia esaki.

   Publico lo por sigui e evento siguiendo transmisionnan cu lo ta en vivo riba websites internacional, incluyendo esun di NASA.  Tambe lo por busca ‘Live Eclipse 2026’ riba YouTube pa asina topa cu varios canal cu ta transmitiendo esaki en vivo.

   Segun Maduro, e na Aruba por sigui e Eclipse online ya for di alrededor di 12:00 pm (ora di Aruba).  Desde e ora ey, mayoria di e websites lo cuminza stream e fenomeno.

   (DIARIO a menciona cu e cientifico di Aruba, esta Dr. Edward Cheung lo bay ta na Spaña den e area unda lo bay bira scur.  Ora cu esaki ta socede na Spaña, esaki lo bay ta durante casi bahada di solo.)

   Eclipse Lunar pronto: Jeremio Maduro a indica cu na Aruba lo por bay mira un Eclipse e luna aki, pero lo ta anochi y marduga.  Esey ta un Eclipse Lunar parcial cu lo ta visibel na Aruba.  E lo ta riba e anochi di Diahuebs 27 pa Diabierna 28 di Augustus.  Mas o menos 96% di luna lo drenta den sombra di planeta tera.

   Eclipse di luna pa Aruba lo start banda di 10:48 pm riba Diahuebs (27 Aug) anochi, y lo termina pa 1:48 am riba Diabierna (28 Aug) marduga.  E punto maximo di e eclipse lo ta 12:12 am, y bo tin di wak directamente na halto.

   Segun Maduro, Space and Nature Aruba Foundation lo ta haciendo livestream riba Facebook durante e Eclipse Lunar.  Pues si acaso tin nubia of bo no por sali pafo, toch bo por mira esaki riba online.

   Eclipse Lunar ta safe pa mira cu bo wowonan of binocolar.