Control efectivo na KIA a resulta den deteccion di intento pa pasa droga den prizon

Delivery di saco di ijs cu droga a fracasa

ORANJESTAD (AAN): Danki na vigilancia y control di personal di KIA, autoridadnan a logra detecta y stroba un intento pa pasa droga den KIA.

   Esey a wordo confirma door di Minister di Husticia, mr. drs. Arthur Dowers, y e ta califica cualkier intento pa introduci droga of otro articulo prohibi den KIA como inaceptabel y a enfatisa cu no lo tolera accionnan cu ta pone siguridad den prizon na peliger.

   Minister di Husticia, mr. drs. Arthur Dowers, a indica cu e caso specifico aki ta bao di investigacion.

   Tur cos a socede durante entrega rutinario di saconan di ijs na prizon di KIA, autoridad den prizon a tuma nota di comportacion sospechoso di e personal di e compania encarga cu e entrega di ijs.

   Minister Dowers a elogia e vigilancia di e empleadonan di KIA cu a detecta e movecion sospechoso y a actua sin duda. Sigun e mandatario, e caso ta mustra precisamente pakico control estricto y vigilancia constante ta necesario dentro di un institucion manera KIA.

   Introduccion di droga den prizon ta completamente inaceptabel. No ta importa si e intento ta bin di pafo of si tin hende di paden envolvi. Tur persona cu ta drenta KIA mester compronde cu tin regla y control cu mester respeta.

   E investigacion ta sigui pa determina si tin mas persona envolvi den e caso y si e intento pa pasa droga ta parti di un actividad mas amplio. Si investigacion mustra cu tin otro persona envolvi, e instancia concerni lo actua di acuerdo cu ley y reglanan aplicabel.

   Ademas di droga, autoridadnan tin atencion pa contrabanda den prizon, incluyendo telefon celular y otro obhetonan no permiti. Cualkier intento pa pasa contrabanda den KIA ta afecta directamente orden y siguridad dentro di e institucion y lo haya e atencion necesario di autoridad.

   Minister Dowers a indica cu no por acepta cu personanan cu tin acceso na KIA, sea pa motibo di trabao, entrega of cualkier otro servicio, uza e acceso ey pa purba pasa articulonan prohibi.

   E caso aki ta demostra cu control y vigilancia ta duna resultado, pero tambe cu autoridadnan mester keda alerta pa evita cu droga, telefon celular y otro contrabanda logra drenta e prizon.  E potretnan aki ta di archivo.