FPNC ta den ‘full swing’ cu nan proyecto back to school

Gabriel Marchena, Trahado Social:

*E necesidad di ayudo ta abarca di Kleuter te Universidad 

ORANJESTAD (AAN)-- Gabriel Marchena, Trahado Social di Fundacion pa Nos Comunidad (FPNC), a duna di conoce na Matutino DIARIO, cu FPNC ta “den full swing” cu nan proyecto di Back to School.

Actualmente nan ta reparti tas y otro articulonan di scol, y ya caba nan tin 600 peticion cu a registra pa e proyecto cual no ta desconoci.

“Nos ta keda cu e mesun criterio cu ora ta yega pa haci e ‘Financieel Toezicht’ nos ta pidi datonan di e mayornan cuanto gasto nan tin y cuanto ta nan entrada p’asina nos por evalua tambe y aproba e ayudo.

“Actualmente locual nos ta ripara, nos tin ‘so & so’, agenda, pa locual ta muchanan di scol basico, nan mester calculator, y uniform segunda mano. Semper nan ta welcome cu nos ta yuda e muchanan aki tambe, cu ne. Tas nos ta hayando hopi aworaki, e ta bayendo hopi bon”, Marchena a señala. Tambe nan mester di notebook, entre otro articulonan escolar. Personanan cu kier yuda, por haci donacion boluntario tambe y por hacie via e fundacion su cuentanan bancario. Aruba Bank ta yuda hopi, #1000. Pone si descripcion “back school project”, cu eigenlijk ta destina pa e proyecto. “E ora ey nos mes ta haci compra di e articulonan y nos ta yuda e muchanan cu mester di dje”, Gabriel Marchena a relata.

Pa loke ta uniforma di scol, e necesidad ta abarca tur nivel, pues di Kleuterschool  te Universidad di Aruba.

“Pero si nos haya uniform y jeans di segundo mano tambe ta welcome, pa nos yuda e muchanan bay scol bon ekipa tambe”, Gabriel a reitera.

Encuanto cifranan, aña pasa FPNC a yuda 555 mucha y aña aki nan a surpass e cantidad y awo tin 600 mucha cu a caba di registra. “Pero mi ta kere e lo bira mas mirando tambe cu e situacion financiero di mayornan no tur ora ta e miho. Esnan cu entrada minimo y esnan cu no tin entrada mes, gastonan ta sobrepasa entrada, anto den cuadro di esaki nan ta bin tambe na remarca pa ayudo. Pero semper nos ta haci un toezicht financiero pa nos evalua cu nos ta yudano net e muchanan den necesidad, cu nos ta wak cu no tin entrada pa cubri tas, y demas material escolar”, Gabriel Marchena a reitera.