Accident frontal grave riba Diasabra mainta na Palm Beach

Manehador di Yamaha Raptor seriamente herida

ORANJESTAD (AAN): Tabata Diasabra mainta alrededor di 8:00 am, cu monton di yamada a cuminza drenta na Central di Polis, y tur ta referi na un accident basta fuerte, y pisa cu a socede riba caminda di Noord pa Palm Beach, na altura di Bingo Café & Restaurant, un poco pariba di Citgo Palm Beach.

   Mesora Central di Polis a dirigi varios unidad di Polis di Noord pa e lugar, y tambe a manda Specialista di Trafico pa check esaki, como cu informe a drenta tin un persona critico benta eybao.

   E prome unidad di Polis cu a yega, a bin topa cu un vehiculo tipo Sport ATV di 4 wiel modelo Yamaha Raptor 700R basta kibra banda di caminda, y tambe un SUV modelo Kia Sorento color blanco cu number V-4221.

   Abao a bin haya e manehador di e Yamaha Raptor cu heridanan grave na su curpa, y pesey a pidi pa Ambulans yega cu maximo urgencia.  Ora cu Paramediconan a yega, nan a core atende e victima masculino di 24 aña di edad, pa asina logra stabiliza su situacion, y despues cu urgencia a bay cu ne rumbo pa Servicio di Emergencia na Dr. Horacio Oduber Hospital.

   Mientras tanto, Polisnan a cera e caminda pa basta rato pa asina Ambulans por haci su trabao, y tambe Polis di trafico.  Testigonan a bisa cu ta trata aki di un accident frontal, unda cu e Yamaha Raptor a bay core na su banda robez di caminda y dal frontal den e Kia Sorento.  Pero Polis tin e palabra final den e investigacion, aunke a nota cu mayoria di e golpi na e Kia tabata na su banda dilanti/robez.  E testigonan  indica cu e victima tabata mustra di ta basta grave.