Dia Nacional pa Cuida Aruba tin como meta colecta shen ton di sushi riba un solo dia

ORANJESTAD (AAN): Diabierna mainta, un dia prome cu Dia Nacional pa Cuida Aruba, Gobierno a tene un ultimo rueda di prensa na e Zona di Desperdicio na Parkietenbos.

Durante e encuentro, Prome Minister mr. Mike Eman y representante di diferente organisacion a presenta e ultimo preparacionnan logistico pa e gran accion nacional di limpiesa cu lo tuma luga diasabra 25 di juli. Hefe di Prensa Marko Espinoza a habri e rueda di prensa, enfatisando e meta comun di e iniciativa: un Aruba limpi. Cu e lema “P’ami. P’abo. Pa nos tur”, Gobierno ta invita habitante, empresa, club deportivo, centro di bario y otro organisacion pa uni forsa y contribui na cuido di nos isla.

Mike Eman: “Un oportunidad pa trece comunidad hunto”

Prome Minister Mike Eman a indica cu durante e ultimo simannan a traha intensamente pa reuni e partnernan necesario pa realisa e accion nacional. Diasabra, for di 7 or di mainta, lo tin 26 localidad rond Aruba caminda ciudadano por entrega e desperdicio cu nan colecta den nan cas, bario, caya, centro comunitario, club deportivo of area recreativo. Eman a gradici tur persona y organisacion cu a pone nan tempo, personal y recurso disponibel. Segun Prome Minister, e actividad no ta solamente un esfuerso pa haci Aruba mas limpi, sino tambe un manera pa fortalece union y responsabilidad comparti den comunidad. E mandatario a recorda cu e centro di desperdicio ta un facilidad importante caminda pueblo por entrega sushi gratuitamente durante shete dia pa siman. Despues di ceramento di e dump dor di Gobierno anterior, Gobierno awor ta aumenta su esfuersonan pa crea alternativa y atende e problema di tiramento ilegal di sushi.

CMO ta coordina e localidadnan

Director di Crisis Management Office, Rino Hermans, a splica cu CMO a reuni cu tur coordinado cu lo ta presente na e diferente localidadnan. E coordinadonan y boluntarionan ta prepara pa guia publico y mantene un circulacion di trafico di un manera ordena. Hermans a pidi comunidad pa separa desperdicio na cas prome cu transport’e. Esaki lo acelera e proceso di descarga, facilita transporte y permiti pa procesa e cantidad mas grandi posibel di sushi. El a enfatisa cu e boluntarionan ta presente pa yuda. P’esey, comunidad mester sigui nan instruccionnan y colabora cu nan, pa e operacion por transcuri bon y sin problema.

Ecotech: separa desperdicio ta esencial

Sales & Marketing Manager di Ecotech, Julio Wever, a sostene e importancia di entrega desperdicio debidamente separa.

Material manera hero, desperdicio grandi, mata y otro tipo di sushi mester wordo tira separadamente. Segun Wever, esaki ta facilita y acelera e proceso di maneho y procesamiento na Ecotech. El a ramarca cu no lo acepta asbestos, material peligroso ni bestia morto como parti di e accion. Ecotech lo ta presente na e zona di desperdicio na Parkietenbos di 7 or di mainta te 2 or di atardi pa ricibi y procesa material permiti.

DOW cu tent, baki y equipo pisa

Director interino di Departamento di Obra Publico (DOW), Daryl Lue, a informa cu nan ta encarga cu instalacion di tent, baricada y otro material necesario na diferente punto di coleccion. E ploegnan di DOW, den coordinacion cu e otro instancianan, lo yuda cu transporte y retiro di sushi. Truck y ekipo di makinaria pisa lo ta disponibel pa atende e localidadnan y move material manera mas rapido y eficiente posibel. CMO lo funciona como punto central di coordinacion, pa dirigi e ekiponan na e lugar cu tin mas necesidad y evita cu sushi acumula na e punto di coleccionnan.

Serlimar ta atende parti pariba di brug

Hefe di Mantencion di Bario di Serlimar, Michael Kock, a indica cu Serlimar lo concentra su trabou principalmente den e parti pariba di brug, for di Savaneta pa riba. E compania lo encarga cu baki, transporte y circulacion di buca desperdicio den e zonanan asigna. Colaboracion entre Serlimar, DOW, CMO, Ecotech y e otro partnernan mester percura pa sushi wordo colecta y transporta sin causa retraso of congestion na e localidadnan.

Informacion pa comunidad

Riba e website ArubaTaNosTur.com, publico por lesa tur infromacina necesario, e lista di localidadnan y instruccionnan tocante con pa separa y entrega desperdicio. Gobierno ta haci un apelacion na henter comunidad pa participa diasabra mainta, sigui instruccion di e coordinadornan y entrega solamente material cu ta permiti. Dia Nacional pa Cuida Aruba ta busca demonstra cu, apesar di nos diferencianan, nos por forma un solo pueblo uni pa un meta comun: tene nos Aruba limpi, saludabel y bunita.

Dia Nacional pa Cuida Aruba ta un iniciativa di Gobierno di Aruba cu ta busca fortalece responsabilidad comparti den cuido di nos isla. Bou di e lema “P’ami. P’abo. Pa nos tur.”, e campaña ta invita ciudadano, empresa, scol, club, fundacion y organisacion pa uni forsa durante un gran accion nacional di limpiesa riba diasabra 25 di juli. Ademas di limpia diferente area rond Aruba, e iniciativa tin como meta crea mas conscientisacion cu cuido di nos entorno ta responsabilidad di nos tur. Un Aruba limpi y bon cuida ta cuminsa cu compromiso y accion di cada ciudadano. Pa mas informacion subi www.arubatanostur.com