Esaki ta un splicacion di e diferente tipo di tereno cu tin na Aruba

Parlamentario Evelyn Wever-Croes

• Haya sa di diferencia entre eigendom, erfpacht compara cu huurgrond 

ORANJESTAD (AAN): Den edicionnan special di ‘Kico ley ta bisa’, Parlamentario Evelyn Wever-Croes a elabora riba e diferente tipo di tereno cu nos tin na Aruba. Esakinan ta eigendom, erfpacht of huurgrond. Sinembargo, e parlamentario ta indica cu hopi ciudadano no conoce e diferencia. Y Parlamentario Wever-Croes a splica esaki den detaye.

   E prome ta tereno eigendom, e propiedad ta di e doño . Niun hende por kita e tereno for di e doño si e mes no kier. E doño por bende e tereno, e por lag'e pa herencia, y por uza e tereno manera cu bo ta desea contal cu ley ta permiti, e ley di ROPV. Como doño di un tereno eigendom, e ta paga e impuesto di grondbelasting na gobierno.

   E di dos ta Erfpacht. Esaki ta un tereno di Gobierno. Gobierno ta otorga e tereno y e ciudadano por uz’e pa 60 aña. Gobierno ta duna e tereno cu destinacionnan specifico, manera pa construi un cas of un localidad comercial. Ora e 60 aña ta bay vence, e ciudadano por pidi pa prolonga e derecho di uzo di e tereno. Den caso di erfpacht ta paga dos cos, grondbelasing manera ta e caso di eigendom, y erfpachtcanon, cu ta e impuesto cu ta paga pa uza e tereno pa 60 aña. Esakinan ta cobransanan di un biaha pa aña.

   E di tres tipo di tereno ta Huurgrond cu tambe ta di Gobierno. Gobierno ta huur e tereno na e ciudadano pa uza pa un proposito specifico, por ehempel pa cria bestia of planta. Riba huurgrond no por traha cas of otro tipo di construccion, pasobra e ley ta bisa cu solamente e por wordo uza pa agricultura of cria bestia.

   E diferencia entre eigendom, erfpacht compara cu huurgrond ta cu ora cu huur caba, gobierno por dicidi di kita e tereno bek y haci uzo di dje of pa duna otro hende. E motibo pakico ley ta haci e diferencia aki entre e tres tipo di propiednan aki ta pasobra cada tipo di tereno tin un otro meta y obhetivo.

   Eigendom ta duna bo siguridad permanente, pasobra e propiedad ta di bo. Erfpacht ta permiti gobierno conserva e tereno pero e ciudadano tin e siguridad di por haci uzo di e tereno pa 60 aña. Huurgrond ta keda di Gobierno y mester uz’e pa agricultura y cria di bestia. Gobierno por recupera e tereno si e tin mester di dje pa otro proposito of pa otro tipo di necesidad.

   “P’esey ta hopi importante pa bo conoce exactamente ki tipo di tereno bo tin, pa bo conoce bo derechonan, bo obligacionnan y kico bo mester paga pa mantene bo derechonan”, Parlamentario Wever-Croes a remarca.

   Pa cualkier pregunta riba e topico aki, por comunica libremente cu Parlamentario Evelyn Wever-Croes.