No ta cuestiona e importancia di e proyecto pa mehora maneho di desperdicio, sino e forma cu a ehecuta e proceso

Evelyn Wever-Croes, Lider di Fraccion di MEP

ORANJESTAD (AAN): Pa loke ta trata e asunto rond di e contrato entre ATA y Ecotech cu Minister Cicilia, Lider di Fraccion di MEP, señora Evelyn Wever-Croes, a expresa cu bon gobernacion no ta solamente señala ora cos no ta bay bon. Segun Wever-Croes, bon gobernacion tambe ta implica ofrece solucionnan constructivo y comparti sugerencianan pa garantisa cu procesonan di interes publico ta bay miho den futuro. Cu e meta ey, e ta presenta cuatro les clave pa preveni duda y reforsa e transparencia cu pueblo di Aruba ta exigi. 

Cuater les clave pa futuro

Wever-Croes a aclaria cu e no ta cuestiona e importancia di e proyecto pa mehora maneho di desperdicio na Aruba, sino e forma cu a ehecuta e proceso. 

1. Cada minister mester actua den su responsabilidad:

Minister di Turismo mester concentra den su cartera di turismo y labor, mientras cu e minister encarga cu maneho di desperdicio mester guia y coordina proyectonan di e naturaleza ey, manera ley ta prescribi. 

2. ATA mester keda den su rol legal:

ATA por contribui na proyectonan nacional, pero semper dentro di e marco di su tarea legal. Un alternativa tabata pa ATA paga un dividendo adicional na Pais Aruba pa e suma di e contrato, pa despues e minister competente y SERLIMAR conduci e negociacion, evaluacion y firma di e proyecto. 

3. Transparencia ta cuminsa cu destaho publico:

Ora ley ta exigi un destaho publico, mester sigui e procedimento ey. Incluso den situacionnan urgente, ley ta ofrece mecanismonan specifico pa actua cu rapidez sin laga e principionan di transparencia un banda. 

4. Evita tur aparencia di conflicto di interes:

Si un miembro di board no a participa den un decision pa motibo di un posibel conflicto di interes, ta fundamental pa e no firma e documentonan ni contractnan corespondiente. E paso aki ta garantisa e transparencia y ta fortalece e confianza den e proceso. 

Conclusion

Lider di Fraccion a enfatisa cu e puntonan aki no ta un critica pa simplemente critica, sino sugerencianan constructivo pa fortalece e manera di traha di gobierno y pa evita duda den futuro. Proyectonan cu bon intencion ta logra nan maximo efecto solamente ora nan wordo ehecuta conforme ley, cu transparencia y cu bon gobernacion.

Pa loke ta e caso aki, Wever-Croes a indica cu e ta en espera di e informacion solicita na e minister competente. Unabes e documentacion completo yega, e fraccion lo evalua e siguiente pasonan cu e seriedad y responsabilidad cu e asunto aki ta rekeri.