Criminalidad Hubenil na Aruba a yega na un nivel alarmante

Anualmente entre 90 y 100 mucha ta wordo deteni

*OM a pone un Fiscal special pa atende cu criminalidad hubenil 

ORANJESTAD (AAN): E situacion di criminalidad den hubentud ta hopi alarmante. Ministerio Publico, hunto cu otro instancianan a traha un plan pa atende cu e situacion aki cu ta hopi serio.

   Como 90 pa 100 mucha deteni: Ministerio Publico den su relato di 2025 ta mustra cu e analisis di criminalidad den hubentud di 2013 a mustra cu e ta un problema serio pa Aruba.

   Cifranan ta mustra cu entre 90 y 100 mucha menor di edad, ta cay den man di husticia y ta presenta como sospechoso na Ministerio Publico.

   Ministerio Publico ta mustra cu e falta di un maneho dirigi riba e problema di criminalidad hubenil ta forma un risico grandi pa comunidad. Esaki, door cu e muchanan por desaroya nan mes den criminalidad, sin cu realmente tin consecuencia pa nan.

   Creando insiguridad den comunidad: Ministerio Publico ta preocupa cu e desaroyo aki mirando cu e cantidad di criminalidad hubenil ta sigui subi y e delitonan ta bira mas y mas serio.

   E cantidad di casonan caminda muchanan ta haci asalto arma, viola hende, bendemento di droga y riba dje, e uso excesivo di violencia, ta causa sentimento di insiguridad den comunidad.

   Ministerio Publico ta mustra cu esaki ta causa daño pa Aruba door cu e muchanan cu ta haci e delitonan aki, ta cay sera y no ta forma parti di comunidad. Nan no ta crea un futuro sano y ta contribui mas poco na e bienestar di Aruba.

   Fiscal special pa criminalidad hubenil: Ministerio Publico a pone un Fiscal special pa atende cu criminalidad hubenil.

   Tin medidanan di castigo manera, pone e mucha(nan) culpabel bou di encargo of bou di supervision for di cas. E intension ta pa purba di mira kico ta e mihor manera pa atende cu e situacion, envez di cera e mucha(nan) den prizon. Ta tene reunionnan entre Ministerio Publico, Voogdijraad, Reclasering y e departamento di Polis JZP pa mira kico ta e mihor manera pa atende su e situacion.

   Sinembargo ta presenta casonan caminda no tin otro manera cu mester castiga e mucha(nan) cu castigo di prizon.

   Cas di siguridad pa mucha: E instancianan a bin cu Cas di Siguridad pa mucha. Esaki ta un forma cu ta usa pa soluciona e problema social serca muchanan cu a cay den criminalidad.

   Den e Cas di Siguridad, ta haci lo maximo pa haya solucionnan pa atende cu e mucha(nan) y evita mas tanto posibel cu e mucha(nan) lo haya castigo di prizon.

   Prizon no ta e solucion: E Cas di Siguridad ta contribui mas hopi den preveni criminalidad hubenil. Ministerio Publico ta mustra cu e hecho cu ta confronta scarcedad di hende specialisa pa traha cu e muchanan, ta tranca tur esfuerzo.

   Ministerio Publico ta mustra cu un problema cu tambe ta confrontando, ta e hecho cu na KIA ta limita di medionan pa resocialisa e muchanan cu a haya castigo di prizon, pa asina evita cu nan ta bolbe cay den man di husticia.

   Institucion pa mucha: Tambe ta confrontando e situacion cu e seccion di detencion na KIA pa muchanan ta chikito. Esey ta haci cu no por diferencia esnan cu ta pa promer biaha ta cay sera den KIA, cu esnan cu ta sera pa casonan serio. Esey ta trece cun’e, cu e chens tey cu e muchanan ta wordo contagia cu e presonan cu ta sera pa casonan pisa.

   Ministerio Publico ta boga pa Aruba tin un institucion special pa muchanan cu ta cay den criminalidad.