Un exitoso anochi di reunion di diferente club di Kiwanis

ORANJESTAD (AAN): Recientemente Kiwanis Club of Palm Beach a organiza un fantastico ‘Interclub meeting’. 

Na esaki tabata un placer pa mira presencia di miembronan di Kiwanis Club of Aruba, y tambe Kiwanis Club of San Nicolas, pa asina combersa, si؜ña, y colabora.

   E anochi ey tabatin orador invita señora Maidi Maduro, kende a presenta su tesis riba e uzo di Asiento pa Mucha na Aruba, y esaki a habri un debate interesante riba e siguridad di muchanan como pasahero, y tambe con por traha hunto pa asina marca e diferencia.

   Tambe a duna detaye di e recien convencion di EC&C District teni na Toronto, y a haya sa mas di e proximo Division Council Meeting cu lo ta na Suriname, y e EC&C District Convention na Bahamas.

   A duna un palabra di pabien na e president Ross.  Tin biaha ora bo ta involucra den algo, bo no ta realiza ta con hopi a wordo logra.  Pesey tanto Ross y su directiva tabatin un aña excepcional.

   Tambe a gradici president Michel Frank, pa a organiza e evento aki.  Nan ta sinti cu e aña aki ta bayendo fantastico p’e.  Nan kier pa e mantene e impulso aki pa un trimester mas.

   Hunto, esnan di Kiwanis ta mas fuerte, y asina por yuda sirbi e muchanan di Aruba.