San Nicolas semper tabatin prioridad pa su gobernacionnan

Segun Prome Minister Mike Eman:

ORANJESTAD (AAN): Segun Prome Minister Mike Eman, pa Gabinetenan Eman, San Nicolas semper tabata un prioridad. Na aña 2009, e gobierno a desaroya e Green Corridor cu tabata esencial pa conecta San Nicolas, specialmente tambe pa hotelnan na San Nicolas. Green Corridor a habri caminda pa desaroyo.

   Prome Minister a remarca cu banda di e Green Corridor, e mesun tempo aki, a haci hopi trabao di infrastructura na San Nicolas entre otro, Carnaval Village, renobacion na Village y de Vuyst, Yuwana Morto, y Watertoren. Tambe a renoba monumentonan sumamente importante manera Nicolas Store, cu a bira un punto di atraccion pa actividadnan dunando centro di San Nicolas un bida. A introduci e muralnan cu awe ta un di a atraccionnan pa ciudadanonan como tambe pa turistanan.

   “Lamentablemente e desaroyo no a wordo continua durante e gobernacion di e gabinete anterior. Sinembargo awe nos ta pick e up atrobe”, Prome Minister Eman a remarca.

   Un di e proyectonan cu dentro di poco, manera Investering Fonds pasa Parlamento, ta bay cuminsa cu e desaroyonan den centro di ciudad di San Nicolas. Un otro proyecto segun Prome Minister, ta edificio di MFA cu ainda Gobierno ta den deliberacion cu SOGA pa wak e posibilidad si esaki ainda ta cay bou di SOGA y posibelmente lo cuminsta construccion na september venidero.

   E proyecto comunitario di renobacion di Bernhardstraat tambe ta andando. Esaki, segun e prome mandatario, no ta un proyecto di miyones di Florin. “E ta un proyecto cu ta envolve un comunidad mes den revitalisa e area”, Prome Minister a expresa.

   E premier a menciona un aspecto cu lo tin un impacto grandi pa cu e area di refineria. Durante di e bishita di Secretario di Estado Eric Van der Burg, Gobierno lo firma e acuerdo pa Hulanda asesora Aruba cu expertonan pa hunto cu stakeholders na Aruba, determina e forma cu ta bay invita mundo comercial pa bin mira kico por haci pa redefini y duna un proposito di sostenibilidad duradero na e area di refineria.

   “Esaki lo trece cu ne tambe e apoyo di Hulanda pa nos por percura pa limpia e partinan cu por wordo limpia cu lo trece un actividad grandi na San Nicolas”, Premier Eman a duna di conoce.

   Segun Prome Minister, e parti di limpiesa no solamente lo crea cuponan di trabao, pero lo trece un mensahe, cu tur e 8 añanan cu a tarda, y a keda draai sin tuma decision y sin haci nada na final, awor si ta bay tin actividad. “Mi ta sigur cu San Nicolas Bussiness Assosiation lo ta hopi satisfecho pa mira con e proyectonan aki uno pa uno ta relata na otro treciendo impacto grandi pa San Nicolas”, Prome Minister Mike Eman a termina ta bisa.