Wardacosta cu rescate riba lama grandi mas di 320 km panort di Aruba

Apendix di pasahero femenino a kibra

ORANJESTAD (AAN): Tabata Dialuna merdia pa atardi, cu Centro MOC di Wardacosta di Caribe Hulandes a ricibi un peticion pa asistencia for di un barco crusero, como cu tin un persona femenino cu a bira basta malo.

   Den e coordinacion aki, Oficina di CMO na Aruba tambe a envolvi su mes aden pa yuda e logistica.  Ora cu e peticion a drenta, e barco crusero ainda tabata basta leu di Aruba, y por bisa cu e tabata hasta ‘pafo’ di e area maritimo di Aruba.

   A haya sa cu e persona femenino ta di 40 aña di edad, y a haya dolor agudo na parti abao di su barica, y ta pensa cu ta su apendix a rementa.  Esaki ta rekeri pues un operacion urgente, y e cabina di docter abordo di un barco crusero no ta ekipa pa esaki.

   Pesey a pidi asistencia urgente.  Sinembargo a splica e capitan di e crusero, cu ainda e ta pafo di e zona di responsabilidad di Aruba, y tin di warda te ora cu e drenta den awanan teritorial di Aruba pa por haci e rescate.

   Ora cu e barco crusero tabata como 300 pa 340 km Noordwest di Aruba, e ora e Helicopter di Wardacosta a lanta vuelo y a dirigi su mes pa e barco.  Nan a yega eynan ora cu ya caba a bira scur.  E ta un distancia grandi.  E ta comosifuera e helicopter a bula for di Aruba te yega na Maracay (na Venezuela).

   No obstante cu lama ta bruto debi na biento fuerte e siman aki riba Lama Caribe, e pilotonan di e Helicopter di Wardacosta a ehecuta un acercamento perfecto.  Na a momento cu e helicopter a yega, a logra hisa e pashent abordo di e helicopter, y asina a bula y bin bek como 1 ora den halto prome cu a yega Aruba.

   Mientras tanto, CMO a percura pa un Ambulans cu Paramediconan ta presente na parti zuid di Aeropuerto pa ora e Helicopter a yega.  Tambe a core notifica Hospital y tambe specialista riba e caso urgente aki, ya cu esaki lo ta un operacion urgente riba e pashent.

   Ora cu e Helicopter a yega, a traslad’e mesora pa e Ambulans, y di e forma ey cu urgencia a mobiliza rumbo pa Servicio di Emergencia di Dr. Horacio Oduber Hospital.