Polisnan a haya detenido di 60 aña morto den Cel na Warda di Polis

Na San Nicolas

ORANJESTAD (AAN): Alarma a wordo bati Diaranson anochi, ora cu a bin descubri un persona sin señal vital den e Celnan di Detencion na Warda di Polis na San Nicolas.

   Vocero Liliana Rasmijn di Cuerpo Policial, a confirma cu tabata Diaranson 1 di Juli 2026 pa mas o menos 8:20 pm, cu ora Polisnan ta haci nan control rutinario di detenidonan den cel na e Warda di Polis, cu a bin nota algo inusual.  Esey ta cu a bin topa cu un detenido masculino cu no ta reacciona, y no tin señal vital.

   Mesora e agentenan a informa Chef van Dienst, y alavez a pone Central di Polis na altura.  Esey a pone cu Central di Polis na su turno, segun draaiboek, a pone tur autoridadnan competente na altura.

   Hefe di Districto, Dokter Forensico, ekipo forensico di BFTO, y Landsrecherche a presenta pa haci nan investigacion.

   Departamento di Slachtofferhulp a presenta tambe pa asina guia e famia den e momento dificil aki.  Cu shersh di Funeraria e restonan mortal a wordo saca di Warda di Polis.

   E detenido cu a fayece ta un hende homber di 60 aña di edad naci na Aruba.  Polis no a suministra nomber ni inicial di e fayecido.  Pero si vocero a splica cu awor e caso ta bao investigacion di Landsrecherche.

   DIARIO y Cuerpo Policial ta manda palabra di condolencia na famia di e fayecido.