Si no ta pa Stadion FIFA no a bay di acuerdo pa pone 5 miyon dollar pa traha 7 veld

Ex-minister di Deporte Endy Croes:

ORANJESTAD (AAN)-- Parlamentario Endy Croes,y ex-Minister di Deporte den su declaracion pa DIARIO, tocante e proyecto di renovacion di Stadion Guillermo Prospero Trinidad, a bisa cu Aruba Voetbal Bond tambe ta contento di por a haya e yabi di e facilidad aki, pa habri y cera stadion, pero nan no por cubri gasto y mantene e facilidad.

El a subraya cu no ta nan so ta use, pero tin otro federacion cu tambe ta hacie. E Parlamentario a señala cu si e mandatario a cambia pa otro grupo, e tin cu structur’e, mester tin hende cu traha doble shift di mainta te anochi, pa pega luz, subi y baha bandera, mantene e yerba, kita e sushi di paloma, drecha e bañonan y mantene nan limpi. Kiermen, tin hopi trabao pa haci.

“Kiermen, bo no por kere cu coi e yabinan bay cas cu ne pa casi un aña anto stadion ta wordo mantene su so. Mi no ta culpa hende, pero ta e direccion, e maneho no ta corecto actualmente. Anto, ta unico stadion cu di berdad ta riba nomber di gobierno”, e parlamentario a indica. El a agrega cu minister Croes ta purba mancha e bunita proyecto di stadion, y mas atras e ta bay. “Anto, e ultimo aña si nan wanta cuater aña e ta sali como e salbador. Pa mi, no matter, mantene e stadion, percura pa e muchanan tin  un bunita facilidad, pa nan por hunga bala. Corda cu si no ta pa Stadion FIFA no a bay di acuerdo pa pone cinco miyon dollar, pa traha siete veld. E veldnan ta nombra cu ta Nacional, Bubali, River Plate, RCA, Dakota, Estrella y La Fama. Y banda di esey a bin e diez veldnan chikito, cu na Januari 2025 FIFA a ofrece Aruba, te na drenta Maart el a haye ta termina e proyecto na Pos Chikito”, Parlamentario y ex-Minister di Deporte a trece dilanti.