Minister Gerlien Croes:
ORANJESTAD (AAN) Minister di Deporte, señora Gerlien Croes, a sigui elabora riba e tema di renovacion di Compleho Deportivo Guillermo Prospero Trinidad, indicando cu na dado momento el a keda den un bay-bin cu e directiva di Lotto, y na dado momento tabata tin traspaso cu mester a tuma lugar. Nan a saca vacaturenan pa e miembronan nobo di e bestuur di Lotto, y aworaki tin un directiva nobo, aworaki nan tin como seis siman cu bestuur nobo, Gerlien Croes a duna di conoce.
“Esey kiermen cu nos a haci un opname di tur loke falta den e facilidad aki. Pero mester di presupuesto y gobierno di Aruba no tabata cla cu presupuesto cla pa esaki, pasobra mi tin cu informa comunidad cu nos mester di alomenos 3.6 miyon cu falta pa por finaliza e proyecto aki”, e mandatario a relata.
El a agrega cu e tribuna parti panoord ta “afgekeurd”, e toren cu atletismo ta uza a cay den otro, e bañonan abao no ta den bon condicion tampoco, tur e tehelnan a lanta, entre otro, por ehemplo tin preocupacion pa cuater column, bao di e tribune cu nan no sa den ki condicionnan ta ya cu nan a wordo tapa cu cierto material, y awo tin cu bay wak bao di esaki con deep e beton ta daña, y e parti pafo di e gym tampoco a wordo renova.
“Y, mi mester warda pa ora e presupuesto di e aña aki wordo oficialmente trata, hunto cu e raad di Lotto, pa wak si tin espacio. Duidelijk ta, cu 3.6 miyon nos tin cla poni un banda. Diaranzon cu a pasa nos a sinta hunto, Raad di Lotto mes a bay wak e situacion, personalmente, siman pasa, y entre nan dialoga riba kico nan por pone disponible, pa locual mester tin mas prioridad cu mester wordo atendi cu ne”, Minister Gerlien Croes a trece dilanti.
