Un liderazgo responsabel no ta bandona su encargo den medio di retonan grandi

Parlamentario Shailiny Tromp-Lee:

ORANJESTAD (AAN): E reciente anuncio di Minister-President Mike Eman tocante su retiro planifica a habri un scenario di incertidumbre y instabilidad cu Aruba no por carga den e momentonan aki. 

Mientras cu e partido na mando ta bende esaki como un ‘momento historico’, e realidad pa e Pueblo di Aruba ta uno fastioso: Eman a laga nos den un limbo politico net ora cu e pais mester di madurez, direccion y un timon firme pa enfrenta decisionnan structural di mas grandi. 

Como parlamentario, mi no por keda sin expresa mi profundo preocupacion pa e bashi di poder cu e anuncio aki ta crea. Aruba ta den medio di procesonan crucial, incluyendo e evaluacion di e Rijkswet di finanzas (HOfA) y e discusionnan di presupuesto. Un gobernacion no por funciona efectivamente ora cu su cabes tin un fecha di caduca/sali afor poni, pasobra esaki ta paralisa e aparato gubernamental y ta debilita nos posicion di negociacion internacional.

E impacto real riba nos Pais: 

• Incertidumbre Financiero: E mercadonan internacional y e instancianan di supervision financiero mester di un gobierno solido y structuralmente stabil. Un periodo di 'transicion' prolonga pa hopi luna ta duna un señal di instabilidad cu por afecta nos credibilidad y rating financiero gravemente.
• Paralisis Administrativo: E anuncio ya a cuminsa crea un distraccion interno den e coalicion. En bes cu ministernan ta enfoca riba nan carteranan, e atencion ta bay structuralmente riba un bataya di liderazgo. E declaracionnan publico di e propio partnernan di coalicion cu no tabata na altura ta proba cu e cohesion a kibra.
• Falta di Cumplimento: Un mandato di pueblo ta wordo duna pa un periodo completo. Bandona e timon bisando cu bo ta bay memey di un gobernacion ta un falta di respet pa e confiansa cu e electorado a deposita.

E Diferencia Den Liderazgo

Liderazgo no ta un asunto di interes propio of di agenda di partido; liderazgo ta un compromiso sagrado cu bienestar di un pueblo. E situacion fastioso aki ta pone nos refleha riba e tipo di lider cu Aruba berdaderamemte y structuralmente mester. 

Ora un lider ta goberna cu curason y cu un berdadero sintimento di responsabilidad pa cu nos pais, e sa cu interes general semper ta bin prome cu su mes. Un lider cu berdadero vocacion di servicio, manera nos lider di fraccion Evelyn Wever-Croes, nunca lo scoge pa pone interesnan interno of personal riba e stabilidad di Aruba. Gobernacion serio ta rekeri pa bo t’ey presente, determina y firme te na e ultimo dia di bo mandato, specialmente ora e lamper ta corta y e olanan ta halto. 

Aruba tin mester di claridad, no di un transicion prolonga cu ta crea instabilidad. Como oposicion responsabel, nos lo exigi den Parlamento tur e splicacionnan necesario, pasobra pueblo tin derecho riba un bida stabiel y un gobernacion cu no ta wordo uza como un herment di campaña interno. P’esey mes un carta a keda manda pa Presidente di Parlamento pa yama Prome Minister pa un reunion publico, pa asina e bin responsabilisa su mes y brinda e claridad, transparencia y trankilidad cu e pais aki merece.