Hulanda a pone articulo 38 den HOFA pa evita cu politiconan haci loke nan kier manera cu a pasa den e ley di LAft

Segun Giovannie Trim

ORANJESTAD (AAN): E Organisacion Vos di Pueblo recientemente a entrega un carta na VNO cu destinacion na partnernan na Hulanda cu e meta pa haya clarificacion riba diferente publicacion entre otro di mesun partnernan den Reino riba diferente topico. Señor Giovanni Trim di e organisacion, den entrevista cu DIARIO a indica cu e partnernan aki mes ta bruha hopi biaha y no conoce e lucha cu Aruba a hiba pa nos Status Aparte. 

Den e carta, e organisacion ta cuminsa pa ilustra e deseo pa ta bon partners den Reino pa traha bon cu otro y hunto bay dilanti. Pero principalmente, e carta ta dirigi pa Hulanda mes trece claridad den e contexto di ley di Reino HOFA. Segun Trim, na Aruba, cada partido politico tin nan mesun version di HOFA y dificilmente ta haya e storia real. 

Trim a remarca cu e mes a studia e documento di 43 punto di e ley di Reino HOFA y a conclui cu tur e contenido di e ley ta asina positivo pa Aruba y a saca su conclusion pakico esnan cu ta contra HOFA ta focus solamente riba un punto, esta punto 38. Segun e, esaki ta e unico argumento cu nan a haya pa mustra henter e ley mustra malo. 

Lesando y studiando e documento, señor Trim a conclui cu Hulanda ta bin cu articulo 38 pa percura pa loke cu a pasa na aña 2015 no ripiti mas. E ta referi cu na e aña aki politiconan a boycott e LAft, legalmente a bypass e LAft pa logra haci loke cu nan kier.  E ta señala cu Hulanda a wak esaki y a dicidi cu e momento aki ta esun corecto pa bin cu ley di Reino HOFA pero lo pone mas atencion riba e punto di articulo 38 y hinc’e den otro pa loke a pasa cu LAft no ripiti mas. 

“Esaki ta loke ta haci cu e politiconan cu ta contra HOFA ta birando loco cu e punto aki pasobra cu esaki berdad fiesta a caba pa nan pero di otro banda, ora fiesta caba pa politiconan cu mal intension, fiesta a cuminsa pa pueblo”, señor Trim a expresa.