Ta invita comunidad di Aruba participa di Fiesta di Cunuco enfoca riba Dera Gay

Director Departamento Adulto Mayor Desiree Helder:

ORANJESTAD (AAN)--  Desiree Helder, directora di Departamento di Asunto di Adulto Mayor, a yama un conferencia di prensa, den presencia di Ministernan Geoffrey Wever y Minister Mervin Wyatt-Ras, y señor Maduro (cu ta organiza eventonan), den cual el a elabora riba e actividad “Fiesta di Cunuco” dedica na adultonan mayor.

“Esaki ta e dos biaha cu nos ta organiza un evento similar. E aña aki nos kier hacie na luna di Juni, pa enfoca riba un evento masha grandi pa Aruba, cu ta Dera Gay. Tambe, nos lo tin musica baile, y nos ta invita publico en general pa bin disfruta no solamente di cuminda, coi dushi, obra di man cu adulto mayor mes ta trahe, y ta bay bende durante e evento aki. Tambe bin disfruta di e musica y cultura di Aruba, y tambe pa sostene e adultonan mayor cu ta bay bende nan productonan, pa di e manera aki colecta fondonan pa sigui haci actividadnan pa nan mesun grupo, pa enfoca riba participacion di nos adultonan mayor y engrandece nan gruponan”, señora Helder a señala.

El a agrega cu e ta contento di a haya sosten di Santa Rosa pa realiza e evento aki, pa yuda e adultonan mayor pa traspasa nos cultura, pa medio di un evento ameno, cu musica, y baile y tambe pa nos hobennan sera conoci cu kico tur Aruba ta ofrece.

El a duna di conoce tambe cu tur cos lo ta bao di tent pa tine mas fresco, lo tin facilidad di baño, awa y refresco, y lugar cerca pa para e autonan.