Tin hopi cas na Aruba no tin bari di sushi

Maikel Gomes, City Inspector:

*Ta spera cu barinan di sushi di Serlimar a yega caba of ta yegando

ORANJESTAD (AAN)--  Encuanto e situacion cu hopi cas na Aruba ta conoce, den sentido di  no tin un bari di sushi accesible, City Inspector Maikel Gomes a comenta, den entrevista cu Matutino DIARIO, e ta spera cu enberdad e barinan di sushi di SERLIMAR a yega of ta yegando caba.

“Mi mes no a papia cu Director di Serlimar ainda, nos no a sinta, pero mi tin entendi cu e barinan a yega. Tin hopi cas na Aruba cu e famia no por, sea pasobra nan a stop di paga y esaki a wordo kita den pasado, y no a wordo poni bek. Segun mi tin entendi, e Director di Serlimar a duna di conoce cu lo bay tin un solucion p’e, pa e personanan purba  yega na un areglo di pago,  of pa e personanan aki wordo acerca  pa yega na un solucion; mi ta kere, esaki ta bay trece un cambio”, Maikel Gomes a indica.

El a agrega cu pa casualidad, e tabata tin un combersacion cu e Hefe Financiero di Bijstand, señora Arends, na DAS, cu si tin cambionan cu ta biniendo aden, y e ta bezig cu ley tambe, y cu ta conoci cu esnan cu tin bijstand por yega pidi ayudo na DAS. “Nan ta haya un carta, of un bewijs, y nan por bay cu ne na Serlimar pa yega na un areglo, algo cu nan por paga”, Gomes a señala.

El a agrega cu tin hopi cas na Aruba unda no tin bari di sushi. “Tin hopi caso tambe cu tin un bari pa varios apartment cu ta algo cu ta ‘pasando lama’ pio cu un cas. Esaki ta algo cu, mi ta kere, Serlimar tin cu pone extra wowo riba dje, pasobra si bo tin un propiedad cu un cas anto cu cinco of seis apartamento, ta mas cu  logico pa tin un bari pa cada apartamento”, Maikel Gomes a subraya.

El a bisa cu esey ta keda den man di e doño di e propiedad, y lo ta bon si busca un bari grandi cu hopi capacidad pa carga sushi.

“Mi a kere cu bo mester ta conciente tambe cu bo ta bezig ta huur un cas, cu seis of siete apartamento, bo no por cu un solo bari di sushi”, el a remarca.