Muhe y un teenager deteni pa caso di agresion pisa

Nan mes a graba con nan a bati un persona

ORANJESTAD (AAN): Diahuebs merdia Recherche a detene dos hende muhe. Esaki ta enconexion cu un caso cu a sosode Diadomingo 31 di mei 2026, na unda un dama hoben indefenso a wordo agredi den veranda di su cas. E video a plama riba social media.

   Autoridad hudicial di Jeugd- en Zeden Politie (JZP) a tuma e keho y den forma eficaz y investigacion relampago, conhuntamente cu Recherche di Oranjestad cu tambe a forma parti y den bon comunicacion y trahando hunto a pone man riba sospechosonan involucra den e caso encuestion.

   Ta trata di e muhe di fam K. naci na Aruba di 21 aña di edad, y e otro ta muhe hoben tambe di fam K.  di 14 aña di edad.  E video ta e prueba cla y raspa con mahos nan a dal e victima, y esaki mes lo wordo uza contra nan den Corte.

    Cuerpo Policial Aruba ta manda un yamada cla y raspa cu NO ta tolera tipo di actonan di agresion, e ta contra ley y nan lo sigui combati esaki pa un miho bienestar pa nos comunidad.