Aruba lo enfrenta temporada di calor excesivo mientras cu preparacion pa horcan ta continua

Rino Hermans di CMO:

ORANJESTAD (AAN): Aruba lo ta enfrentando un temporada di calor excesivo den e lunanan benidero. Segun Director di Crisis Management Office (CMO) Aruba, señor Rino Hermans, e isla ta den un aña particular mientras cu temporada di horcan oficialmente lo cuminsa otro siman. 

Hermans a splica cu e efecto di El Niño, cu ta fuerte den region atlantico, ta hungando un rol importante den e condicionnan climatologico actual. Segun e, e sistema di presion halto ta causando mas biento durante e temporada aki. 

Debi na e calor excesivo, tanto Departamento di Salud Publico (DVG) como CMO lo ta enfoca riba promocion di salud general y conscientisacion di comunidad. Hermans a indica cu pueblo lo keda informa regularmente tocante recomendacionnan preventivo. Pa cuminsa, el ta aconseha comunidad pa bebe hopi awa y mantene cas y camber climatisa, specialmente pa nos hendenan grandi y personanan cu ta inmobiel, pa asina nan por permanece den un ambiente agradabel y sigur durante e periodo di calor excesivo. 

En cuanto proteccion di muchanan, Hermans a agrega cu informacion y conscientisacion ya a wordo comparti cu tur scol na Aruba. El a enfatisa cu mayoria scol na Aruba ta climatisa y cu muchanan generalmente tin un resistencia mas halto contra calor cu adultonan mayor. 

CMO tambe ta sigui cu preparacionnan pa temporada di horcan. Segun Hermans, ya a haci revision di rooinan y otro infrastructuranan importante, y preparacionnan necesario lo continua durante e periodo aki. 

Segun e, eña aki no ta premira cu lo bay tin hopi actividad atlantico, pero no mester tin hopi tormenta pa causa daño. Un evento fuerte ta basta pa afecta y destrui economia.

El a enfatisa cu comunidad mester kita e mito cu Aruba ta completamente pafo di e “hurricane belt”. Segun Hermans, Aruba no ta den e zona cu cada aña ta haya impacto directo di horcan, pero historicamente, mas o menos cada 10 pa 12 aña, e isla ta enfrenta awacero excesivo cu ta causa inundacion serio. 

“CMO ta sigui cu nos plan di preparacion. Nos a reuni durante varios luna cu tur departamento responsabel y nos conoce e capacidad di Aruba pa responde na cualkier eventualidad di awacero excesivo,” Hermans a conclui.