Partido RED Democratico semper tabata pro supervision financiero externo

Señor Rudy Lampe:

ORANJESTAD (AAN): Señor Rudy Lampe di Partido RED Democratico Aruba, den un entrevista cu DIARIO a duna su opinion tocante e ley di Reino HOFA. Señor Lampe a enfatisa cu for di inicio, Partido RED a vocifera cu nan ta pro supervision financiero externo. Segun e, ta hopi importante pa na unda tin placa di pueblo, tin control externo. “Sin control externo, cos ta bay fout”, el a expresa.

   Segun e, e partido kier mara HOFA na dos condicion. E prome condicion ta cu e mester aplica cu e deficit di e presupuesto di Aruba no por sobrepasa e tres prociento di e GDP. E di dos condicion ta cu e debe externo di Aruba no por sobrepasa e 40 porciento di GDP manera IMF ta recomenda.

   El a menciona cu esaki ta importante pa Aruba mantene e balor di nos Florin. El a indica cu ful Europa, siendo paisnan grandi, tambe ta mara na e dos condicionnan aki den e pacto di Union Europeo. Si nan no cumpli, tin sancionnan riba nan.

   “Mesun cos nos kier pa un HOFA pa Aruba. Si Gobierno no cumpli cu e dos condicionnan aki, ta bin sanccion externo. Esaki ta e unico manera pa mara e man di nos politiconan, cu tin man los cu placa di pueblo, treciendo nos Florin den peligro pa devalua”, señor Lampe a enfatisa.

   El a duna di conoce, cu cumpliendo cu e dos condicionnan aki, Gobierno lo mantene e balor di nos Florin pa futuro. El a expresa atrobe den nomber di Partido RED, cu nan ta na fabor di supervision financiero externo dentro di e contenido aki.

   Alavez, señor Lampe ta invita pueblo di Aruba en general pa asisti na e charla di diasabra awo, 30 di mei, na unda señor Jayburtt Dijkhoff lo elabora riba e posicion di Partido RED riba e topico aki. E charla lo ta gratis y lo tuma luga den sala di ATHA, Caya Appeldam 2 na Dakota for di 10 or di mainta pa 12 or di merdia.