Directie Ouderenzaken ta sostene proyecto pa midi pobreza na Aruba

Desiree Helder, Directora di Directie Ouderenzaken:

ORANJESTAD (AAN): Hunto cu Centraal Bureau voor de Statistiek Aruba, Directie Sociale Zaken Aruba, Departamento di Asuntonan Economico, Comercio y Industria Aruba, Centraal Bureau voor de Statistiek Hulanda y otro stakeholders, Dircetie Ouderenzaken ta forma parti di e comision cu ta trahando riba e proyecto pa midi pobreza na Aruba. E proyecto aki ta wordo financia door di Gobierno di Aruba hunto cu Hulanda (TWO).

   Directora di Directie Ouderenzaken, Señora Desiree Helder a duna di conoce cu e meta di e programa ta pa haya miho bista con ta defini pobreza y ken tur ta cay bou pobreza na Aruba. Pa Directie Ouderenzaken ta hopi importante pa sa cua ta e adultonan mayor specialmente cu ta cay bou di pobreza y pa tin miho bista con nan por asisti y evita cu adultonan mayor ta cay den e situacion aki.

   Na final di e proyecto cuminsamento di otro aña, lo tin miho bista ken ta cay bou di e grupo aki y kico ta e problemanan cu nan ta encontra entre otro no por paga awa y coriente, falta di cuminda, transporte of no por paga vivienda, entre otro.

   “P’esey nos ta sostene e proyecto aki y nos ta parti di e comision pa nos tambe haya miho bista di ken tur ta wordo confronta cu pobreza na Aruba y si ta adultonan mayor, pa tuma accion pa wak con nos por yuda nan”, señora Helder a expresa.

   El a agrega cu Directie Ouderenzaken tin hopi bon cooperacion cu Departamento di Asuntonan Social y tambe tin contacto estrecho cu Fundacion pa nos Comunidad y tur e pasadianan y casnan di cuido pa nan tin bista amplio di e problematica na Aruba cu ta trata adultonan mayor.

   Pobreza no ta simplemente falta di placa; e ta falta di siguridad, dignidad y oportunidad pa biba un bida digno. Cu e proyecto aki, Aruba ta dal un paso importante pa no solamente identifica e problematica, pero tambe pa crea solucionnan concreto pa proteha esnan mas vulnerabel, specialmente nos adultonan mayor. Pasobra un sociedad fuerte ta wordo midi no solamente den cifranan economico, sino den con e ta cuida su pueblo.